Ер адам супермаркетте әйелді бірнеше сағат бойы кепілде ұстап отыр
Германия астанасы Берлинде ер адам супермаркетте әйелді кепілге алып, бірнеше сағат бойы босатпай отыр, деп хабарлайды Politico.kz.
Оқиға 10 шілде күні кешке қаланың Мариенфельде ауданындағы Rewe супермаркетінде болған.
Полицияның мәліметінше, күдікті әйелді жергілікті уақыт бойынша сағат 22:00 шамасында кепілге алған. Қазіргі уақытта құқық қорғау органдары арнайы операция жүргізіп, күдіктімен келіссөздер жүргізіп жатыр.
Полиция өкілі Штефан Петерсен-Шюманнның айтуынша, әзірге қылмыстың нақты себебі белгісіз. Оқиға орны толық қоршауға алынып, арнайы жасақ, полиция қызметкерлері және жедел жәрдем бригадалары жұмылдырылған.
БАҚ мәліметінше, оқиға кезінде супермаркет ішінде бірнеше қызметкер болған. Таңертең полицейлер ғимараттың ішіндегі жағдайды бақылау үшін арнайы баспалдақ пайдаланған.
Қазіргі уақытта кепілдегі әйелдің жағдайы мен операцияның нәтижесі туралы ресми ақпарат жарияланған жоқ. Тергеу жалғасуда.
Соңғы жаңалықтар
