Грузияда қаза тапқан қазақстандық трансгендер туралы жаңа дерек шықты

27 қарашада Грузияда қазақстандық азаматша Томирис Құсайынованың қаза тапқаны белгілі болды, деп хабарлайды POLITICO.KZ.

Бұл ақпаратқа қатысты Centralmedia24 порталының ресми сұрауына жауап берген ҚР Сыртқы істер министрлігі оқиғаның егжей-тегжейін бөлісті.

СІМ мәліметінше, қазақстандықтың өлімі туралы хабар 26 қарашада Грузиядағы Қазақстан елшілігіне түскен. Ведомство марқұмның соңғы екі жыл шамасында шет мемлекетте тұрғанын нақтылады.

«Грузия полициясының ақпаратынша, қазіргі уақытта процессуалдық шаралар жалғасып жатыр. Қазақстанның елшілігі грузин құзырлы органдарымен байланыста болып, жағдайды бақылауда ұстауда. Сонымен қатар дипломаттардың қолдауымен 30 қараша күні марқұмның денесі Қазақстанға репатриацияланды», – деп хабарлады министрлік.

ҚР Сыртқы істер министрлігі қазақстандықтың өліміне қатысты нақты себептерді әзірге жария етпегенін атап өтті.