Халық қай банкке көбірек сенеді?

Қазақстандықтардың банктерге деген сенімі жыл санап артып келеді. Соңғы бір жылдың ішінде ғана халықтың депозиттегі қаражаты 4 трлн теңгеге көбейген. Бұл туралы Finprom.kz сараптамалық порталына сілтеме жасап Politico.kz хабарлайды.

Қазіргі таңда еліміздегі екінші деңгейлі банктердегі жеке тұлғалардың сақтаған ақшасы 28,6 трлн теңгеден асты. Бұл азаматтардың қаржылық сауаты артып, жиған-тергенін "жастық астында" емес, табыс әкелетін депозитте сақтауды үйренгенін көрсететін нақты дәлел.

Тек сәуір айының өзінде ғана банктердегі халық салымдары 396 млрд теңгеге (1,4%) өскен. Дегенмен, қазақстандықтар қаржысын кез келген банкке апара бермейді. Нарықта айқын көшбасшылар бар.

Қазақстанда тіркелген 23 банктің бәрі бірдей халықтың сеніміне ие бола алған жоқ. Бір жылдық қорытынды бойынша олардың 11-і ғана өсім көрсетсе, қалғандары кері кеткен.

Жылдық өсім бойынша сөзсіз көшбасшы – Kaspi Bank. Бір жыл ішінде бұл банктің депозиті 1,2 трлн теңгеге (20%) көбейген. Биылғы мамыр айының басындағы жағдай бойынша, халықтың Kaspi-дегі жинағы 7,1 трлн теңгеге жетіп, бүкіл нарықтың төрттен бір бөлігін иеленіп отыр.

Екінші орында баспана алуға ақша жинайтын қазақстандықтардың негізгі таңдауы – Отбасы банкі тұр. Ондағы халықтың салымы бір жылда 724,7 млрд теңгеге (28,2%) артқан.

Үздік үштікті Halyk Bank түйіндейді. Бұл қаржы институтына салынған ақша көлемі 663,9 млрд теңгеге (9,4%) ұлғайған. Ал егер тек бір айдың ішіндегі өсімді (сәуір-мамыр) алсақ, Банк ЦентрКредит (BCC) өте жақсы нәтиже көрсетіп, депозитін бір айда 100 млрд теңгеге көбейткен.

Сарапшылар депозит көлемінің бұлайша күрт артуы мен трендке айналуын үш негізгі фактормен түсіндіреді:

• Тартымды пайыздық мөлшерлемелер. Қазіргі таңда банктер ұсынып отырған жоғары пайыздар инфляцияның орнын жауып қана қоймай, үстінен қосымша табыс табуға мүмкіндік береді;
• Қызметтің цифрлануы. Бұрынғыдай банк бөлімшелеріне барып, кезекте тұрудың қажеті жоқ. Кез келген адам смартфоны арқылы екі-үш минутта депозит ашып, оны кез келген уақытта толтыра алады;
• Сенімнің артуы. Банктер ақшаны сақтаудың және басқарудың ең түсінікті әрі қауіпсіз құралына айналды. Мобильді қосымшалардағы «автоматты түрде ақша жинау» функциялары да халықтың қызығушылығын арттырып отыр.

Жалпы алғанда, қазақстандықтар арасында ақша жинау мәдениеті қалыптасып үлгерді. Бұл ел экономикасы мен банк секторының тұрақты дамып келе жатқанын аңғартады.