Инфляция және нақты табыс: Шаталов Президенттің үкіметке қойған негізгі талаптарын атады

Мәжіліс депутаты Никита Шаталов үкіметтің кеңейтілген отырысында көтерілген мәселелерге қатысты пікір білдірді, деп хабарлайды Politico.kz.

Мәжіліс депутаты Никита Шаталовтың айтуынша, Президенттің бүгінгі сөзіндегі негізгі мәселе – инфляциямен күрес және қаржы секторын реттеу болды.

Депутат Мемлекет басшысының баяндамасында инфляцияны ауыздықтау мәселесі «қызыл желі» болып тартылғанын атап өтті. Оның сөзінше, қазіргі таңда жеке сектор тарапынан экономиканы қаржыландыруды тежеп тұрған да осы мәселе. Сондай-ақ жиын барысында квазимемлекеттік сектордың бизнеспен орынсыз бәсекелестігі қатты сынға алынған.

«Президент Үкімет пен Ұлттық банктен кезекті талқылауларды емес, мерзімі түсінікті және нәтижесі нақты болатын бірлескен іс-қимылдың жаңа жоспарын талап етті. Әңгіме әр блок бойынша жауапты тұлға бекітілген және жұмыстың нәтижелі не нәтижесіз екенін көрсететін нақты шешімдер жүйесі туралы болып отыр», – деп жазды сарапшы.

Шаталовтың пікірінше, алдағы үш жылда инфляцияны тұрақты деңгейге түсіру үшін бюджетті нығайту қажет. Егер бюджет қаржысын «игеру» тәжірибесі сол күйінде жалғаса берсе, пайыздық мөлшерлемелермен ғана баға өсімін тоқтату мүмкін емес. Сол себепті тиімсіз шығындар қысқартылып, ақша тек қайтарымы бар салаларға бағытталуы тиіс.

Халық қалаулысы жаңа инвестициялық цикл мәселесіне де тоқталды. Оның ойынша, нарық өз бетінше жұмыс істей алатын жерде бюджет қаржысының орнын жеке инвестициялар басуы керек.

«Квазимемлекеттік сектор ресурстар, кадрлар және жобалар үшін бизнеспен бәсекелесуді тоқтатуға міндетті. Экономикада жеке капитал мен түсінікті ережелер неғұрлым көп болса, инфляцияның себептері соғұрлым азаяды», – деді депутат.

Соңында Никита Шаталов Президенттің басты талабын атап өтті. Ол – халықтың нақты табысының өсуі.

«Әсіресе, инфляция қосылған үстемеақыны «жұтып» жатқанда, қарапайым халықтың қалтасында тоқырау сезілгенімен, ІЖӨ өсе беруі мүмкін. Сондықтан бұл жолғы үндеуде инфляциямен күрес – қазақстандықтардың лайықты өмір сүруінің негізгі шарты ретінде көрсетілді», – дейді депутат.