Путин Трамптың ашуын бәсеңдету үшін арнайы өкіл жіберді

Ресей президенті Владимир Путиннің сенімді өкілдерінің бірі Кирилл Дмитриев Вашингтонда келіссөздер өткізіп, АҚШ президенті Дональд Трамптың ашуын бәсеңдетуге тырысты, деп хабарлайды POLITICO.KZ The Times басылымына сілтеме жасап.

Дмитриев соңғы үш жылда Вашингтонда ресми келіссөз жүргізген алғашқы жоғары лауазымды ресейлік шенеунік атанды. Ол Трамптың арнайы өкілі Стивен Уиткоффпен кездесті.

Сапар Ресей мен АҚШ арасындағы қарым-қатынас ең күрделі кезеңге тап болған тұста өтті. Бұған дейін Кремль Трамптың Украинадағы бейбітшілік орнату ұсыныстарын қабылдамай қойған еді.

«Трамп Нобель сыйлығын алғысы келеді және Кремльдің жылдам дипломатиялық жеңіс бермегеніне ашулы», – деп жазды The Times.

Трамп сондай-ақ Ресей мұнайын сатып алуды жалғастырып отырған елдерге — мысалы, Қытай мен Үндістанға қарсы ауыр тарифтер енгіземін деп ескерткен.

Кирилл Дмитриевтің өмірбаяны ерекше: ол Кеңес заманында Киевте туған, кейін Стэнфорд және Гарвард университеттерінде білім алған, Goldman Sachs банкісінде жұмыс істеген.

Алексей Навальный негізін қалаған ФБК ұйымы Дмитриевті «көлеңкелі сыртқы істер министрі» деп атаған болатын.

Сарапшылардың айтуынша, Дмитриев Вашингтонға экономикалық ұсыныстармен келген:

• Сирек кездесетін металдар бойынша келісімдер;
• Илона Масктың SpaceX компаниясымен ынтымақтастық;
• Арктика мұнайына бірлескен жобалар.

«Дмитриевтің портфелінде не бар? Мұнай өңдеу зауыттары ма? "Транснефтьтегі" үлес пе? "Солтүстік ағын" құбыры ма? Арктикадағы мұнай ма?» – деп сұрады Кремльдің бұрынғы спичрайтері Аббас Галлямов.

Дмитриевтің пікірлері басқа ресейлік шенеуніктерге қарағанда бейбіт сипатта болғанымен, оның Путинге адалдығына ешкім күмән келтірмейді.