Мұзданған электр желілеріндегі апат салдарынан бірнеше ауылда жарық жоқ

Мұғалжар ауданындағы бірнеше ауыл мұз басқан электр желілері мен құлаған тіректердің салдарынан жарықсыз қалды, деп хабарлайды POLITICO.KZ.

Аудан әкімдігінің мәліметінше, 5 қаңтарда Ащелісай мен Сабындыкөл арасындағы 60 электр тірегі, ал Құмсай мен Ақсу аралығында 16 тірек құлаған. Апатқа жоғары ылғалдылық пен тұман себеп болған. Электр желілерінде мұз қатпарының диаметрі 20 см-ге дейін жеткен.

Мұзды сымдардан түсіргеннен кейін, ол қайтадан қатуда, - дейді Мұғалжар ауданының әкімі Дархан Ермағанбетов. - Энергетиктер тәулік бойы жұмыс істеп жатыр. Қазір Жұрын, Қаракөл, Сабындыкөл, Ащысай, Құмсай және Ақсу ауылдарындағы электр желілерін қалпына келтіру жұмыстары жүргізілуде.

5 қаңтар күні кешке Құмсайға жарық берілді, бірақ Сабындыкөл мен Ақсу ауылдарында құлаған тіректер салдарынан жарық жоқ. Қажетті материалдар жеткізілді, ал 6 қаңтардан бастап қалпына келтіру жұмыстары басталады.

«Энергожүйе» ЖШС мәліметінше, ауа райының қолайсыздығына байланысты мереке және демалыс күндері Ақтөбе қаласында және аудандарда электр энергиясы үзілген. Жөндеу жұмыстарына 130 арнайы техникамен 70-тен астам бригада жұмылдырылған.

Ақпарат diapazon.kz сайтынан алынған.