Наурыз айында кімдердің телефоны бұғатталатыны белгілі болды

24 наурыздан бастап абоненттік ұялы құрылғыларды тіркеу ережелері өзгереді.

Телекоммуникациялар комитетінің өкілі Диас Төлегенов 24 наурыздан бастап ұялы құрылғыларды тіркеу ережелері өзгеретінін мәлімдеді. Алайда бұл өзгеріс Қазақстанға жаңадан әкелінген телефондарға қатысты. Бұған дейін сатып алынған құрылғылар автоматты түрде "ақ тізімге" енгізіледі.

Негізгі өзгерістер:

• Телефон сатушылар мен импорттаушылар құрылғыларын сәйкестендіруі керек.
• Тіркеу барысында IMEI кодының түпнұсқалығы, құрылғының заңды түрде әкелінгені тексеріледі.
• GSM жүйесінде құрылғылар үш санатқа бөлінеді:
  • Ақ тізім – заңды, еш шектеусіз құрылғылар.
  • Сұр тізім – уақытша тіркелген, иелері 30 күн ішінде заңдылығын дәлелдеуі тиіс.
  • Қара тізім – жалған, ұрланған немесе заңсыз әкелінген телефондар бұғатталады.

Азаматтарға өзгерістен қорқудың қажеті жоқ. Бұрыннан қолданыстағы телефондарға ешқандай шектеу қойылмайды. Жаңа телефон сатып аларда imei.rfs.gov.kz сайтынан IMEI кодты тексеру ұсынылады.

Жаңа ереже 2025 жылғы 24 наурыздан бастап күшіне енеді.