Оралда автобус жүргізушілері ереуілге шықты

Орал қаласында автобус жүргізушілері жаппай ереуілге шықты, деп хабарлайды POLITICO.KZ.

2025 жылғы 8 қаңтарда «Алый парус» ЖШС-нің автобус жүргізушілері жұмысқа шықпады. Олар кәсіпорындағы әлеуметтік мәселелерді шешуді талап етіп, жалақы кешігуі, зейнетақы мен медициналық сақтандыру төлемдерінің болмауына наразылық білдірді.

Жүргізушілердің басты талаптары:

• Соңғы алты айда әлеуметтік және медициналық төлемдердің жасалмауы;
• Жалақының кешіктірілуі және толық төленбеуі;
• Демалысқа шыққан жұмысшыларға тиесілі төлемдердің берілмеуі.

«Біз жарты жылдан бері медициналық сақтандырусыз жүрміз. Ауырып қалсақ, "Жедел жәрдем" қабылдамайды. Зейнетақы төлемдері де жоқ. Жалақы кешіктіріліп беріледі немесе толық төленбейді. Бұл мәселе шешілуі керек,» – деді механик Нұржан Төлеов.

Орал қаласы әкімінің орынбасары Азамат Халелов мәселені шешуге тырысатынын айтты. Оның айтуынша, компания мемлекеттік субсидияның тек 70%-ын алады, ал толық қаржыландыру көлемі жетіспейді.

«Мәселе шешіледі деп сенемін. Дегенмен, жүргізушілер жұмысқа шығып, тұрғындарды тасымалдауды жалғастыруы керек. Қала тұрғындарынан кешірім сұраймыз,» – деді ол.

Ереуілге байланысты №3, №35, №14, №3К және №51 бағыттарында автобустар жұмыс істемей тұр. Әкімдік тарапынан қысым жасалмайды, бірақ компания қарызы шамамен 60 миллион теңгені құрайды.

Ақпарат mgorod.kz сайтынан алынған.