Премьер-министр белгісіз біреудің қоңырауынан кейін отырыстан шығып кетті

Премьер-министр Олжас Бектенов үкімет отырысы кезінде кенеттен залдан шығып кетті, деп жазады POLITICO.KZ.

Бүгін, 7 қазан күні өткен Үкімет отырысы кезінде Премьер-министр Олжас Бектенов кенеттен мәжіліс залынан шығып кетті.

Отырыс таңертең басталған болатын. Жиынның басында Олжас Бектенов жаңадан тағайындалған Оқу-ағарту министрі Жұлдыз Сүлейменованы таныстырды. Осыдан кейін жаңа министр ант беру рәсіміне кірісті.

Дәл осы сәтте премьер-министрдің жанындағы үкіметтік байланыс телефоны шылдырлады. Қоңырауға жауап бергеннен кейін Бектенов бірден залдан шығып кетті. Бұл жағдай шенеуніктер үшін күтпеген жайт болды. Жұлдыз Сүлейменова антын аяқтағаннан кейін, залдағылар не болғанын түсінбей, бір-біріне қарап, сыбырласа бастады.

Көп ұзамай премьер-министрдің бірінші орынбасары Роман Скляр жиынды өз қолына алып, Денсаулық сақтау министрі Ақмарал Әлназарованы сөз сөйлеуге шақырды.

Олжас Бектенов біраз уақыттан кейін отырысқа қайта оралды. Әдетте, премьер-министр Үкімет отырысын басынан аяғына дейін өзі жүргізеді, сондықтан оның шұғыл шығып кетуіне өте маңызды қоңырау себеп болған болуы мүмкін. Айта кету керек, Бектеновтің жанындағы бұл телефон Президентпен сөйлесу үшін де қолданылады.