Путин бітім үшін төрт аймақты талап етуде

Путин әлі де Украина жерін талап етуде - бұл АҚШ-тың бітім орнату әрекеттеріне соққы, деп хабарлайды POLITICO.KZ.

Bloomberg агенттігі Мәскеудегі дереккөздерге сүйене отырып, Ресей президенті Владимир Путин кез келген бітім шартына төрт украин облысының Ресей бақылауында қалуын міндетті талап етіп отыр деп жазады.

Бұл талап АҚШ президенті Дональд Трамптың соғысты тоқтату және келісімге келу бойынша бастамаларына тосқауыл болып отыр. Ақ үй келіссөздердегі ілгерілеудің жоқтығына байланысты алаңдаушылық білдіруде.

Трамптың өкілі Стив Уиткофф жұма күні Кремльде өткен ұзақ келіссөздер кезінде Путинді қазіргі майдан шебінде атысты тоқтатуға көндіруге тырысқан. Алайда дереккөздердің айтуынша, Путин өз ұстанымын өзгертпей, территорияға қатысты талаптарын сақтап қалды.

Келіссөздер тоқырауға ұшыраған. Ал одан әрі жылжу үшін Путин мен Трамп арасында тікелей байланыс қажет болуы мүмкін.

Ақ үйдің Ұлттық қауіпсіздік кеңесінің өкілі Джеймс Хьюитт:
«Біз ағымдағы келіссөздерге түсініктеме бермейміз. Бірақ Украинамен де, Ресеймен де бейбіт келісімге келу үшін әрекет жасап жатырмыз», – деді.

Трамп әкімшілігі егер жақын арада келісімге қол жеткізілмесе, келіссөздерден бас тартып, Ресейге қысымды күшейтуге дайын екенін білдіріп отыр.

Уиткофф пен Путин арасындағы төртінші кездесуден кейін Трамп бітімнің «өте жақын» екенін мәлімдеген. Алайда кейін ол: «Путин соғысты тоқтатқысы келмейтін секілді» деп, жаңа санкциялар енгізілуі мүмкін екенін де ескерткен.

Еуропалық шенеуніктердің айтуынша, Путин өз территориялық талаптарынан бас тартуға ниетті емес. Дегенмен келіссөздер жалғасып жатыр, жағдай өзгеруі мүмкін.

Франция президенті Эммануэль Макрон Paris Match басылымына берген сұхбатында Трампты Путинге қатаң ұстаным көрсетуге шақырғанын айтты:

«Мен америкалықтарды қатаң ескерту жасау және санкцияларды күшейту мүмкіндігіне сендіре алдым деп ойлаймын», – деді Макрон.

Еуропа тарапының пікірінше, алдағы екі аптада АҚШ-тың Ресей мен Украинамен нақты келісімге келе ала ма, әлде келіссөздерден мүлде бас тартып, Мәскеуге қысымды арттыра ма – осы мәселе шешіледі.