Қазақстан төлқұжаты азаматтарымыз үшін қауіпсіздік символына айналып отыр 

Қазақстан президенті Қасым-Жомарт Тоқаев әрбір қазақстандық қай жерде жүрсе де, мемлекет қорғауында екенін бірнеше рет атап өткен еді. Бүгінде бұл қағида нақты іс жүзінде көрініс тауып отыр, деп хабарлайды Politico.kz.

Қазақстан Таяу Шығыста жүрген өз азаматтарына көмек көрсету және оларды қауіпсіз эвакуациялау үшін барлық қажетті шараларды қабылдап жатыр.

«Қазақстан өз азаматтарын тастамайды» деген қағида қазіргі жағдайда ерекше мәнге ие. Мемлекет қиын жағдайға тап болған қазақстандықтарды елге қайтару үшін дипломатиялық және ұйымдастырушылық жұмыстарды күшейтті. Бұл – азаматтардың қауіпсіздігі әрдайым мемлекеттің басты назарында екенін көрсетеді.

Президент Қасым-Жомарт Тоқаев бұған дейін Қазақстан төлқұжатының күші жыл сайын артып келе жатқанын айтқан болатын. Оның айтуынша, бұл еліміздің халықаралық беделі мен тартымдылығының өсуін көрсетеді. Қазақстан бүгінде әлемнің түрлі өңірінен келген адамдар үшін өмір сүруге, жұмыс істеуге және саяхаттауға қолайлы елдердің біріне айналып отыр. Сонымен қатар қауіпсіздік деңгейі бойынша да Қазақстан көптеген мемлекеттерден алда келеді.

Қазіргі геосаяси жағдай аясында Қазақстан төлқұжатының маңызы бұрынғыдан да айқын көрінуде. Әлемнің түрлі өңірлеріндегі тұрақсыздық жағдайында Қазақстан өз азаматтарының қауіпсіздігін қамтамасыз етуге басымдық береді. Таяу Шығыс елдерінен қазақстандықтарды эвакуациялау – осының нақты дәлелі.

Бұл жағдай Қазақстанның көпвекторлы сыртқы саясаты мен халықаралық әріптестігі азаматтардың мүддесін қорғауға бағытталғанын көрсетеді. Мемлекет өз азаматтарына нақты қолдау көрсетіп, қай жерде жүрсе де олардың артында Қазақстан тұрғанын дәлелдеп отыр.

Сарапшылардың пікірінше, қазіргі халықаралық жағдайда Қазақстан төлқұжаты тек сапар құжаты ғана емес, азаматтардың қауіпсіздігі мен мемлекеттің жауапкершілігінің символына айналып отыр.