Қазақстан Трамп енгізген жаңа тарифке қатысты ресми мәлімдеме жасады

АҚШ президенті Дональд Трамп жариялаған жаңа кедендік баж салығына байланысты Қазақстан үкіметі ресми мәлімдеме жасады, деп хабарлайды POLITICO.KZ.

Сауда және интеграция министрлігінің хабарлауынша, Трамп енгізген тариф Қазақстанның АҚШ-қа экспорттайтын негізгі тауарларына әсер етпейді. Өйткені бұл тауарлар АҚШ әкімшілігінің нормативтік ерекшеліктер тізіміне енгізілген.

«Қабылданған тарифтік шаралар Қазақстанның АҚШ-қа жалпы экспортының тек 4,8%-ына ғана әсер етеді. Үкімет Қазақстанға қатысты қосымша баждарды қолданбау мүмкіндігін талқылау үшін АҚШ тарапымен консультациялар жүргізуге ниетті», – делінген ведомствоның хабарламасында.

2024 жылы Қазақстан мен АҚШ арасындағы тауар айналымы 4,2 миллиард доллар болған. Қазақстаннан экспортталатын негізгі өнімдер қатарында:

• шикі мұнай,
• уран,
• күміс,
• ферросплавтар және өзге де шикізаттық тауарлар бар.

Қазақстан билігі екі ел арасындағы сауда-экономикалық байланыстардың стратегиялық маңызын ескере отырып, қосымша баж салығын болдырмау үшін АҚШ-пен келіссөз жүргізуге дайын екенін мәлімдеді.