Қазақстанда сланец мұнайын өндіру басталады

2025 жылы Қазақстанда алғашқы сланец мұнайы өндіріледі. Бұл туралы үкіметтің кеңейтілген отырысында премьер-министр Олжас Бектенов мәлімдеді, деп хабарлайды POLITICO.KZ.

Премьер-министрдің айтуынша, бұл қадам еліміздің мұнай-газ саласына инвестиция тартуға үлкен мүмкіндік береді. Сонымен қатар, газ өндірісі де дамытылатын болады. «Батыс Прорва» және «Барханное» кен орындарында шамамен 19 млрд текше метр газ қоры анықталған.

«Қарағанды облысында 17 түрлі сирек кездесетін металдар бар ірі кен орны табылды. Қазіргі уақытта осы аймақта графит концентратын өндіруге арналған техникалық-экономикалық негіздеме әзірленуде. Бұл материал электромобильдерге арналған батарея өндірісінде қолданылады», – деді Бектенов.

Мұнай-газ саласындағы бұл жаңа жобалар Қазақстан экономикасына жаңа серпін беріп, инвестиция үшін тартымды жағдай жасайды деп күтілуде.