Қыста ауа райы қандай болады?

«Қазгидромет» алдағы қысқа арналған алдын ала ауа райы болжамын жариялады.

Синоптиктердің мәліметінше, 2025/2026 жылғы қыс Қазақстанда шамамен жылырақ, бірақ күрт температуралық ауытқулармен, боран мен көктайғақпен өтуі мүмкін.

Қараша: алғашқы борандар мен ауа райының құбылуы

Қараша айында еліміздің көп бөлігінде негізінен қар түрінде жауын-шашын күтіледі, ал оңтүстік және оңтүстік-батыс өңірлерде — жаңбыр аралас қар байқалады. Кей жерлерде желдің күшеюі, боран, көктайғақ және тұман болуы ықтимал, әсіресе солтүстік, орталық және шығыс облыстарда.

Синоптиктердің айтуынша, ай бойы температураның күрт ауытқуы байқалады:

Солтүстік, орталық және шығыс өңірлерде түнгі температура –2…–7°С, кей күндері +5°С дейін жылы, күндіз +5…+10°С шамасында.

Ай соңында суықтың күшеюі күтіледі: түнде –15…–20°С, күндіз –10…–15°С.
Оңтүстік және оңтүстік-батыс өңірлерде түнгі температура –3…–12°С аралығында, кейде +7°С дейін жылы болады, күндіз +6…+18°С дейін көтеріледі. Қарашаның соңында аяз –15°С дейін күшеюі мүмкін.

Айлық орташа температура нормадан шамамен 1°С жоғары, ал жауын-шашын мөлшері климаттық нормадан аспайды деп күтілуде.

Желтоқсан: климаттық нормалар шегінде

Желтоқсанда еліміздің басым бөлігінде ауа температурасы климаттық нормаға жуық, ал солтүстік-батыста — шамамен 1°С жоғары болады.
Солтүстік-шығыста, керісінше, сәл салқындау күтіледі.

Жауын-шашын мөлшері орташа нормада, ал орталық пен шығыста — сәл аз болуы ықтимал.

Қаңтар: қалыпты қысқы суық

Қаңтар айында синоптиктер температура климаттық нормаға сай болады деп болжайды. Шығыс өңірлерде шамамен 1°С төмен болуы мүмкін.
Жауын-шашын мөлшері де норма шегінде, тек оңтүстік және оңтүстік-шығыстағы таулы аймақтарда аздап көбірек жауын-шашын күтіледі.

Ақпан және наурыз: біртіндеп жылыну мен қар

Ақпан — қыстың ең жұмсақ айы болмақ. Температура нормадан 1–2°С жоғары, жауын-шашын мөлшері климаттық норма шегінде сақталады.

Наурызда жылы күндер басым болады — орташа температура нормадан 1°С жоғары.
Оңтүстік пен оңтүстік-шығыстың таулы өңірлерінде жауын-шашын нормадан артық, ал Маңғыстау облысында — аздау күтіледі.

«Алдын ала болжам бойынша, 2025/2026 жылғы қыс Қазақстанда жұмсақ әрі салыстырмалы түрде жылы өтеді. Дегенмен, кейбір күндері күшті боран, қалың қар және көктайғақ байқалуы мүмкін», — деп хабарлады Қазгидромет.