Қытай Трамппен сауда соғысында қандай қару қолданатыны белгілі болды

Қытай сирек кездесетін жер металдарын АҚШ-пен арадағы сауда соғысында қысым құралы ретінде пайдаланып отыр, – деп хабарлайды POLITICO.KZ  Oxu.Az сайтына сілтеме жасап.

Бұл АҚШ-тың президенті Дональд Трамптың 2 сәуір күні енгізген жаңа импорттық баж жүйесіне жауап ретінде жасалған қадам. Трамп импортқа 10%-дық базалық мөлшерлеме орнатып, Қытай үшін бұл тариф 34%-ға жеткен. Пекин бұған жауап ретінде АҚШ тауарларына да 34% кедендік баж енгізіп, ҚХР Сыртқы істер министрлігі бұл әрекетті "біржақты және протекционистік қысым" деп атады.

Қытайдың қарсы қадамы – сирек кездесетін металдардың экспортына бақылау

Қытай билігі қабылдаған жаңа шешімге сәйкес, бұл стратегиялық шикізатты шетелге экспорттау қатаң бақылауға алынады. Енді экспорттаушылар:

• Соңғы сатып алушылар туралы нақты ақпарат ұсынуы тиіс;

• Сырьенің қолданылу мақсаты туралы мәлімет беруі міндетті.

Бұл АҚШ-тың жоғары технологиялық секторларына ауыр соққы болып тиюі мүмкін, себебі олар Қытайдан келетін сирек элементтерге тәуелді.

Сирек кездесетін металдар дегеніміз не?

Сирек кездесетін жер металдарына 17 элемент кіреді, олардың қатарында:

• Скандий,

• Иттрий,

• Лантаноидтар бар.

Атына қарамастан, бұл элементтер Жер қыртысында кең таралған, бірақ оларды өндіру мен өңдеу экологиялық қауіпке толы. Олардың ерекше қасиеттері:

• Электроника өндірісінде,

• Электромобильдер мен жел генераторларында,

• Әскери техникада кеңінен қолданылуын қамтамасыз етеді.