Ресей депутаттары Алматыда Жириновскийге ескерткіш қоюды ұсынды

Ресейлік депутаттар Қазақстанның Алматы қаласында Владимир Жириновскийдің құрметіне ескерткіш орнатуды жоспарлап отыр, деп хабарлайды POLITICO.KZ Kursiv.Media агенттігіне сілтеме жасап.

2026 жылы Ресейде және кейбір шетелдік қалаларда Жириновскийдің 80 жылдық мерейтойына орай бірнеше ескерткіш ашу жоспарланған.

Ресей президенті Владимир Путин 2024 жылы қарашада Жириновскийдің туған күнін мемлекеттік деңгейде атап өту туралы жарлыққа қол қойған болатын.

Бұл шараларды Ресей Мемлекеттік Думасының төрағасы Вячеслав Володин басқарады.

"Жириновскийге арналған ескерткіштің ресми ашылуы 2026 жылдың наурыз-сәуір айларында Мордовияның Саранск қаласында өтеді. Сондай-ақ, сәуір-мамыр айларында Ресей Федерациясының бірнеше аймағында және оның "кіші отаны" Алматыда да ескерткіш қою жоспарланған", – делінген ресми құжатта.

Біраздан соң әкімдік ескерткіш орнату туралы ұсыныс түспегенін айтты!

Жириновский кім болған?
Владимир Жириновский 1946 жылы Алматыда дүниеге келген. Ол Ресей Либералдық-Демократиялық Партиясының (ЛДПР) негізін қалаушысы және ұзақ жылдар бойы оның жетекшісі болған.

Саясаткер 2022 жылы 75 жасында қайтыс болды.

Жириновский Ресей саясатында популистік және даулы мәлімдемелерімен танымал болған. Ол Кеңес Одағының ыдырауына қатысты пікірлері мен Қазақстан туралы бірнеше даулы мәлімдемелерімен есте қалды.