Риддер маңында анасынан айырылған қонжық табылды (ВИДЕО)

Шығыс Қазақстан облысының Риддер қаласы маңындағы саяжайлардың бірінде анасынан айырылған қонжық табылды. Жергілікті тұрғындар оны бір апта бұрын Белый луг ауданында байқаған. Енді мамандар оны Өскемендегі хайуанаттар бағына орналастырмақ, деп хабарлайды 1720.yk жаңалық парақшасы.

Риддер тұрғыны Айгүл Смағұлованың айтуынша, кішкентай аю оның биыл ғана сатып алған саяжайын паналап жүр.

«Саяжайыма қонжық келіп алған. Мен ол жаққа сирек барамын. Екі күн бұрын келсем, бүкіл аумаққа саңғырығын тастапты. Алма ағаштарым бар еді. Біз жинап үлгермеген, жерге түсіп, үсіген алмаларды жепті. Шамасы, көршілерге де барлауға баратын сияқты. Ал біздің шағын сарайымызға тығылады», - дейді Айгүл Смағұлова.

Ол үлкен аюды көрмегенін, бірақ көршілерінің теміржол жағасында пойыз қағып кеткен аюдың өлексесі жатқанын айтқанын жеткізді.

«Мүмкін бұл оның анасы шығар, мүмкін емес те шығар, білмеймін», - дейді саяжай иесі.

Айгүлдің көршілері жетім қалған қонжықты одан бұрынырақ байқаған. Олардың айтуынша, аю аумақта еркін жүріп, ұйықтауға сол сарайға барады екен.

Қонжықты аяған адамдар оны шұжықпен, қоюлатылған сүт қосылған бәліштермен және басқа да тағамдармен тамақтандыра бастаған. Алайда, анасыз қалған кішкентай аюдың орманда тіршілік ете алмайтыны анық. Ол әлі өз бетінше азық таба алмайды, қысқа апанын да сала алмайды.

Осыны түсінген саяжай иесі ШҚО Табиғи ресурстар және табиғат пайдалануды реттеу басқармасына хабарласқан. Мамандар жақын арада келіп, қонжықты Өскемендегі Сол жағалау кешенінің хайуанаттар бағына апаратындарына уәде берген.

«Бұл қонжық туралы білеміз, Өскемен хайуанаттар бағымен келісіп қойдық, олар оны паналатады», – деді Орман және аңшылық шаруашылығы жедел әрекет ету отрядының бастығы Ермек Бағланұлы.

Айта кетейік, биыл Сол жағалаудағы хайуанаттар бағында қонжық үш аюды дүниеге әкелген болатын. Ол Риддерден келген жетім қонжықты қабылдай ма, әлде оны бөлек орналастыра ма, ол жағы әзірге белгісіз.