Сауда үйінде ер адам үш жастағы қызды ұрлап кетті

АҚШ-тың Вирджиния штатындағы Фэрфакс округінде орналасқан сауда орталығында үш жасар қызды ұрлау оқиғасы тіркелді. Бұл туралы Daily Mail басылымы хабарлады.

Полиция мәліметінше, бала жабық ойын алаңынан аз уақытқа алыстап кеткен. Сол сәтте белгісіз ер адам телефонмен сөйлесіп жүріп, баланың артынан еріп, кейін көтеріп алып, тез арада белгісіз бағытқа кетіп қалған. Бұл сәт бейнебақылау камераларына жазылып қалған.

Қыздың әкесі оны ойын алаңынан таппаған соң, жағдайды жанында жүрген әйеліне хабарлаған. Анасы белгісіз ер адамның өз баласын алып бара жатқанын көріп, араласып, баланы қайта қайтарып алған.

Полиция күдіктіні 26 жастағы Андрес Касерес Джалдин деп таныды. Оған кәмелетке толмаған баланы ұрлау және ірі көлемдегі ұрлық бойынша айып тағылды. Тергеу барысында белгілі болғандай, оқиғаға дейін күдікті автодүкен аумағынан бір көлікті айдап кеткен. Кейін көлік қонақүйдің автотұрағынан табылып, сол жерден күдікті де ұсталған.

Күдікті полицияға берген түсініктемесінде қызға «ата-анасын табуға көмектескісі келгенін» айтқан. 

Қазіргі уақытта күдікті кепілсіз қамауға алынған.