Семейде жаңа туған сәбиді перзентханада оңдырмай күйдіріп тастаған

Семейдегі перинаталды орталықта жаңа туған нәрестенің денесі күйіп қалған оқиға қоғамда үлкен резонанс тудырды, деп хабарлайды POLITICO.KZ Bairaqmedia.kz-ке сілтеме жасап. Сәби ешқандай ақаусыз, толық мерзімінде дүниеге келсе де, медициналық мекемеде белгісіз себептермен ауыр жарақат алған.

32 жастағы Камаль Оразғалиева 2 қаңтарда 4 келі 150 грамм салмақпен, бойы 58 см болатын ұл баланы дүниеге әкелген. Ата-анасының айтуынша, нәресте толықтай сау болып туған. Алайда арада біраз уақыт өткен соң оның жамбасы, арқасы мен иығы күйіп қалғаны анықталған.

Әкесі Амангелді Жұмашевтың сөзінше, дәрігерлер бұл оқиғаны екі тәулік бойы жасырып келген. Тек кейіннен ғана сәбидің жылытуға арналған төсенішке күйіп қалғанын мойындаған. Дегенмен медицина қызметкерлері бастапқыда бұл жарақатты күйік деп есептесе де, кейіннен оның тұқым қуалайтын дерті болуы мүмкін деп мәлімдеген.

Абай облысының бас неонатолог дәрігері Шынар Астаеваның айтуынша, бастапқыда бұл күйік ретінде қарастырылғанымен, уақыт өте келе жарақаттың табиғаты күмән тудырған. Осы себепті дәрігерлер сәбиді Нұр-Сұлтандағы (Астана) медициналық мекемеге жіберуді жоспарлап отыр.

Қазіргі таңда бұл оқиға қоғамда қызу талқыланып, ата-аналар тарапынан перинаталды орталықтағы медициналық қызмет сапасына байланысты сын күшейе түсті.