Сенат мемлекеттік қызметкерлердің жалақысын көтеру туралы заңды мақұлдады

Сенат мемлекеттік қызметкерлердің жалақысын кем дегенде үш жылда бір рет көтеруді міндеттейтін жаңа заң жобасын мақұлдады, деп хабарлайды Politico.kz.

Құжатқа сәйкес мемлекеттік қызметшілер жұмыс бабымен басқа қалаға ауысқан жағдайда олардың баспана мен заттарын тасымалдау шығындары толық өтеледі. Оған қоса оларға жеңілдетілген ипотека алуға және балаларын балабақшаға кезектен тыс орналастыруға мүмкіндік беріледі. Салада 25 жылдан астам еңбек еткен және марапаттары бар ардагерлер зейнетке шыққан кезде мемлекеттен біржолғы төлем ала алады. Заңда жұмыс уақыты аптасына 40 сағат болып бекітілді, ал 1 және 2 топтағы мүгедектігі бар жандар үшін бұл уақыт 36 сағатқа дейін қысқарады. Бұдан бөлек басшыларға толық емес жұмыс күнін белгілеуге рұқсат етіліп, қызметкерлерге үстеме жұмыс істегені және еңбек өтілі үшін қосымша демалыс күндері беріліп, тиісті өтемақы төленеді.

Бұдан былай шенеуніктерге азаматтардың өтінішін құрғақ сылтаумен кері қайтаруға тыйым салынады, ал тәртіптік комиссиялар жаза тағайындаған кезде жағдайды жеңілдететін мән-жайларды міндетті түрде ескеруі керек. Жаза мерзімі 2 айдан 6 айға дейін созылады және оны мерзімінен бұрын алып тастауға болады. Сонымен қатар заңда өтелмеген аванстарды қайтару үшін жалақының бір бөлігін ұстап қалуға, демалыстан шақырып алуға рұқсат етіліп, жұмыстан қууға әкеп соқтыратын теріс қылықтардың нақты тізімі бекітілді.

Жаңа ережелер бойынша жұмысқа қабылдау процесі eQyzmet жүйесі арқылы толық цифрланып, тәлімгерлер жаңа мамандардың жұмысқа тез бейімделуіне көмектеседі. Этика жөніндегі уәкілдерге де қызметкерлердің мүддесін қорғап, шағымдарын қарау үшін көбірек құзырет беріледі. Заң авторлары медициналық бақылауға да ерекше назар аударып, жауапкершілігі жоғары лауазым иелерінен есірткіге міндетті түрде тест алуды енгізді. Басшылар мұндай тексерістен жыл сайын өтіп тұруға тиіс. Сондай-ақ қызметкерлерге бос жұмыс орындарына конкурссыз 1 жылға дейін уақытша орналасуға рұқсат берілді және бұл кезең жалпы еңбек өтіліне қосылады.

Енді қызметкерлер лауазымы жоғарыламаса да бір орында отырып-ақ әртүрлі жалақы деңгейлері жүйесі арқылы өз табысын арттыра алады. Бұл көлденең өсу жобасы 2 жыл бойы Әділет және Ұлттық экономика министрліктерінде, Мемлекеттік қызмет істері агенттігінде, сондай-ақ Астана қаласы мен Атырау облысы әкімдіктерінде сынақтан өткізіледі. Еңбек кодексі мен сыбайлас жемқорлыққа қарсы іс-қимыл туралы заңдарды қоса алғанда жалпы 18 заңнамалық актіге өзгеріс әкелетін бұл құжатты сенаторлар толық қолдап, президенттің қол қоюына жіберді.