ШҚО-да квадроцикл мінген ер адамды өзеннің қатты ағысы алып кетті

Шығыс Қазақстан облысында өзеннен квадроциклмен өтіп бара жатқан ер адам суға ағып кеткен, деп хабарлайды POLITICO.KZ.

Қайғылы жағдай кеше, 31 тамыз күні болды. Екі адам Кедровка өзенінен өтпек болған. Бірақ қатты жаңбырдың салдарынан өзендегі су деңгейі көтеріліп, қайғылы жағдайға әкеп соқтырды. Ер адамның бірі жағаға шығып үлгерген, ал екіншісін ағыс алып кетті.

Оқиға туралы құтқарушыларға хабарланды. Риддер қаласындағы құтқарушылар іздеу жұмыстарын жүргізіп жатыр. Құтқарушылар 1961 жылы туған ер адамға іздеу салынғанын хабарлады.

«Іздеу жұмысын қатты ағыс күрделендіре түсуде», - деп хабарлады Шығыс Қазақстан облысы ТЖД баспасөз қызметі.