Шымкентте трансұлттық қылмыстық топтың 17 мүшесі сотталды

Шымкент қаласында виртуалды есірткі дүкендері арқылы психотроптық заттарды өндіріп сатумен айналысқан трансұлттық қылмыстық топтың мүшелеріне сот үкімі шықты, деп хабарлайды Politico.kz.

Сотта белгілі болғандай, бұл қылмыстық топ Қазақстан мен көршілес мемлекеттердің аумағында жұмыс істеген. Айыпталушыларға трансұлттық ұйымдасқан топ құру және оған қатысу, заңсыз есірткі сату, қылмыстық жолмен табылған ақшаны заңдастыру және осы қылмыстарға жәрдемдесу сияқты бірнеше ауыр бап бойынша айып тағылды.

Тергеу барысында анықталғандай, топ мүшелерінің бірі 2024 жылы Шымкентте психотроптық заттар дайындайтын жасырын зертхана ашқан, ал оның туысы мен танысы шикізатты жасыруға көмектескен. Сонымен қатар топтың тағы екі мүшесі 2022-2024 жылдар аралығында криптовалюта арқылы есірткі саудасынан түскен аса ірі көлемдегі қаражатты заңдастырумен айналысқан. Ал тоғыз адам тікелей топқа мүше болмаса да, ақша аударымдарын қабылдау үшін өздерінің банк карталарын ұсынып қылмысқа қатысқан.

Сот шешімімен зертхананы ұйымдастырған басты айыпталушы 16 жылға бас бостандығынан айырылды, ал қалған қатысушыларға 2,5 жылдан 11 жылға дейінгі мерзімге жаза тағайындалды.

«Сот үкімімен 17 сотталушы ҚР Қылмыстық кодексінің бірқатар баптары бойынша кінәлі деп танылды. Екі сотталушының жазасын өтеу мерзімі 2 жылға кейінге қалдырылды, бір адам рақымшылық бойынша босатылды және екеуіне 11 миллион теңге көлемінде айыппұл салынды. Ал бір айыпталушының кінәсі дәлелденбегендіктен, ол толық ақталды», – деп хабарлады Шымкент қалалық сотының баспасөз қызметі.

Әзірге сот үкімі заңды күшіне енген жоқ.