Солтүстік Қазақстанда 17 млн теңге ұрлаған есепші сотталды

Прокуратура органдары бюджет қаражатының жұмсалуын қадағалау барысында Солтүстік Қазақстан облысында ірі жымқыру фактісін анықтады, деп хабарлайды POLITICO.KZ Солтүстік Қазақстан облысының прокуратурасына сілтеме жасап.

Мағжан Жұмабаев ауданындағы «Жастар ресурстық орталығында» жүргізілген тексеру барысында, мекеме есепшісінің бюджет ақшасын жүйелі түрде ұрлап келгені белгілі болды.

Анықталғандай, лауазымды тұлға 5 жылға жуық уақыт бойы, яғни 2020 жылдың қаңтарынан 2025 жылдың ақпанына дейінгі кезеңде, өзінің жеке шотына ақша аударып отырған. Ол осылайша «жалақы және өзге де төлемдер» деген желеумен жалпы сомасы 17 миллион теңгені заңсыз иемденген.

Осы бұзушылықтар бойынша 2025 жылғы 27 наурызда аудан прокуратурасы Қылмыстық кодекстің 189-бабының 4-бөлігі (сеніп тапсырылған бөтеннің мүлкін аса ірі мөлшерде иемдену немесе жымқыру) бойынша сотқа дейінгі тергеп-тексеруді бастады.

2025 жылғы 29 қыркүйекте Мағжан Жұмабаев аудандық сотының үкімі шықты. Сот Орталық есепшісін аталған қылмысты жасағаны үшін кінәлі деп таныды. Оған 7 жылға бас бостандығынан айыру жазасы тағайындалды. Бұған қоса, ол енді барлық меншік нысанындағы ұйымдарда материалдық жауапкершілік пен бухгалтерлік қызметке байланысты лауазымдарды атқару құқығынан айырылды.

Алайда, сот жазаны орындауды кейінге қалдыру туралы шешім қабылдады.

Бұған Қылмыстық кодекстің 74-бабының талаптары негіз болған. Сотталған әйелдің жас баласының болуына байланысты, негізгі жазаны өтеу мерзімі 2028 жылдың 27 қыркүйегіне дейін, яғни баласы он төрт жасқа толғанға дейін шегерілді.

Үкім қазірдің өзінде заңды күшіне енген. Прокуратураның хабарлауынша, мемлекетке келтірілген шығын ішінара өтелген. Облыс прокуратурасы бюджет қаражатын пайдаланудың заңдылығын қамтамасыз ету жұмыстарын жалғастыратынын мәлімдеді.

Еске сала кетейік, жақында дәл осындай схеманы пайдаланған Батыс Қазақстан облысының есепшілері сотталған болатын.