Талдықорғанда балабақшада балаларға құрттаған тамақ берілген

Талдықорғандағы «Happy Land» жекеменшік балабақшасында балаларға сапасыз, құрттаған тамақ берілген. Бұл туралы журналист Сандуғаш Дүйсенова ата-аналар жіберген видео мен суреттерге сүйеніп жазды, деп хабарлайды POLITICO.KZ.

Ата-аналар жолдаған кадрлардан ботқадағы құрттар мен тарақандарды, сүйегі ғана қалған етті және күйіп кеткен тоқаштарды көруге болады. Журналистің жазуынша, ас үйдегі ұнның ішінде жәндіктер өріп жүрсе, балаларға берілетін манный ботқасынан құрттар табылған.

Сонымен қатар, балабақшадағы жағдайдың өте нашар екені айтылады: қабырғалар лас, зең басқан, ал ас үйдегі антисанитария балалардың денсаулығы мен өміріне қауіp төндіреді. Тіпті, барлық балаға компот бір ғана қасықпен құйып берілетіні де айтылған.

Бұл жағдай ата-аналардың ашу-ызасын тудырған. Журналист Дүйсенова балаларға берілетін тамақ мөлшерінің аздығын сынап, мұны «заманауи Қазақстанда емес, концлагерьде ұстап отырғандай» деп сипаттады.