Танымал әнші қарт адамға қол жұмсады деген күдікпен ұсталды

Қырғызстандық рэпер Ulukmanapo қарт адамға қол жұмсады деген күдікпен ұсталды.

Қырғызстандық БАҚ мәліметінше, Ulukmanapo лақапатымен танымал Улукман Осмоналиев балабақша күзетшісін ұрған.

Оқиға 28 тамызда бір балабақшада болған. Әнші мен ер адам сөзге келіп, нәтижесінде Осмоналиев күзетшіні ұрып жібергені хабарланды.

Бішкек қаласы Ленин аудандық ІІБ баспасөз қызметі алдын ала тексеріс басталғанын мәлімдеді.

"Алдын ала мәлімет бойынша, балабақша аумағына екі жасар бала кіріп кеткен, артынан 33 жастағы У.О. баланы алып кетуге кірген. 65 жастағы күзетші ескерту жасап, егер бала ауру болса, жұқпалы инфекция басқа балаларға тарауы мүмкін екенін айтқан. Осыдан кейін ер адамдар арасында жанжал шығып, баланың әкесі күзетшіні ұрып жіберген", – деп жазады 24.kg.

Улукман Осмоналиев 1992 жылы 18 қыркүйекте Бішкек қаласында дүниеге келген. Музыкалық мансабын 2016 жылы бастап, алғашында шығармашылығын YouTube пен әлеуметтік желілерде жариялаған. Кей деректерде оның алғашқы бейнебаяны шамамен 3 миллион қаралым жинағаны айтылған.