Тегін дәрі-дәрмек алу жаңа форматта

Қазақстанда тегін дәрі-дәрмектерді "Әлеуметтік әмиян" қосымшасындағы QR-код арқылы беру жүйесі сыналуда, деп хабарлайды POLITICO.KZ.

Бұл пилоттық жоба Абай облысындағы барлық емханаларда іске қосылды. Жоба оң нәтиже көрсетіп, алдағы уақытта ел көлемінде жүзеге асырылуы мүмкін.

Антикоррупциялық қызметтің мәліметінше, бұл жүйе денсаулық сақтау саласындағы жемқорлық тәуекелдерін азайту мақсатында енгізілуде. 2024 жылы Абай облысында дәрі-дәрмек жеткізудегі кешігулер анықталған. Нәтижесінде, пациенттер тегін берілуі тиіс препараттарды өз қаражаттарына сатып алуға мәжбүр болған.

"2024 жылғы сыртқы талдау көрсеткендей, "СК-Фармация" тарапынан дәрілерді уақытында жеткізбеу мәселесі анықталды. Бұл тұрғындардың қажетті дәрілерді өз есебінен сатып алуына әкелді. Жаңа жүйе осы мәселелерді шешуге бағытталған", – деп түсіндірді Антикор.

Статистикаға сәйкес, Абай облысында пациенттер саны 2024 жылы 14%-ға артқанымен, жазылған рецепттердің саны 707,6 мыңнан 682,4 мыңға азайған. Жаңа жүйе осы алшақтықты азайтуға мүмкіндік береді деп күтілуде.