Туған ұлы байлап азаптаған қария басынан өткен жағдайды айтты

Атырау облысының Сағыз ауылында 89 жастағы зейнеткерді туған ұлы ұрып-соғып, үйде байлап ұстаған. Бұл туралы қариямен тілдескен «Ақ Жайық» басылымы хабарлайды.

1937 жылы туған тыл ардагері Әділхан Сисенов 18 маусым күні кенже ұлы Қанаттың өзін соққыға жығып, скотчпен байлап, үйден шығармай қойғанын мәлімдеді. Түнде босанып шыққан қария терезе арқылы қашып, туыстарына жеткен соң полицияға шағым түсірген.

Оның айтуынша, қашып кетпеуі үшін үйдегі терезелердің тұтқалары да алынып тасталған.

"Мені қашып кетпесін деп байлап тастағаны рас, күндіз терезенің темірін алмақ болғанымда ұлым келіп, мені ұрып жіберді, мен шалқаман құладым. Таңнан бері нәр татпай аш отырған едім, ал түнге қарай ұлым қайта келіп, бірдеңелерді айтты да, маңдайымнан ұрды", — деді Әділхан Сисенов.

Зейнеткердің қалай қашып шыққаны туралы оның қарындасы Кенжетай Сисенова айтып берді.

"Ағам дәретханаға барған кезде тауып алған қайшымен скотчты қиып үлгерген. Ал таңғы сағат төрттер шамасында ұлы ұйықтап қалған кезде ол басқа бөлменің терезесінен шығып, көрші тұратын ініміздің үйіне жеткен, содан кейін таңертең мені шақырды", — деді Кенжетай Сисенова.

Онкологиялық есепте тұратын ІІІ топ мүгедегі Әділхан Сисенов әйелі қайтыс болған соң соңғы он жыл бойы ұлы Қанатпен бірге тұрған. Атырауда тұратын екінші ұлы Әдебиет Сисенов әкесін қорғау қажеттігін алға тартып отыр.

"Әкем Қанатпен 2006 жылдан бері бірге тұрады және үйді соның атына жазып берген. Қазір ол дене жарақаттарының сипатын анықтап, психикалық жағдайын бағалау үшін медициналық тексеруден өтіп жатыр, туған ұлының өз әкесіне осылай қарағанын көру маған өте ауыр, сондықтан тиісті шаралар қабылданғанын қалаймын", — деді Әдебиет Сисенов.

Әдебиет әкесін өз қолына алуға дайын болғанымен, қария өмір бойы тұрған Сағыз ауылынан кеткісі келмейтінін білдірген. Журналистер Қанат Сисеновтің өзінен жауап алуға тырысқан кезде ол телефон арқылы жағдайды талқылай алмайтынын айтып, кейінірек хабарласуға уәде бергенімен, байланысқа шықпаған.

Қызылқоға ауданының әкімі Қанат Азмұханов бұл дерек бойынша полиция тексеруі жүріп жатқанын растады.

Қарындасы Кенжетай Сисенованың сөзіне қарағанда, әке мен бала арасындағы кикілжің бұрын да болған, бірақ ол кезде мәселе ақсақалдардың көмегімен шешілген. Бұл жолғы жанжал қарияның газетке жазылып, дәрі-дәрмек алу үшін жұмсамақ болған зейнетақысынан шыққан.

"Ағам отадан кейін өз тамағын ішіп, жуынып, өзін-өзі күте алады. Оған ешқандай мал-мүлік керек емес, тек тыныш өмір сүргісі келеді, тергеу аяқталғанша ол менің үйімде тұрады және кінәлілер жазасыз қалмауы керек", — деді Кенжетай Сисенова.

Атырау облыстық полиция департаменті 19 маусым күні «ұрып-соғу» бабымен қылмыстық іс қозғалғанын хабарлады.

Қазіргі уақытта оқиғаның барлық мән-жайын толық әрі объективті анықтауға бағытталған қажетті тергеу әрекеттері жүргізіліп жатыр.