"Мендей қорлық көрмендер": Өз ұлынан азап көрген қарияны немересі қамқорлығына алды
Атырау облысы Сағыз ауылында кенже ұлынан қорлық көріп, үйде байлаулы болған 89 жастағы тыл ардагері Әділхан Сисеновті немересі Нұрбақыт Ақниетқызы өз қамқорлығына алды, деп хабарлайды Politico.kz.
1937 жылы туған зейнеткерді өз баласы Қанат ұрып-соғып, скотчпен байлап тастағаны туралы ақпарат бұған дейін БАҚ өкілдері арқылы тараған болатын. Өз уақытында совхозда 40 жыл бойы басшылық қызмет атқарған қария қазір қалада тұратын немересінің үйіне көшіріліп, толықтай күтімге алынды.
Желі қолданушыларының сұрақтарына жауап берген немересі ауылға амандасу үшін барып тұрғандықтан, іштегі жағдайды ешкім білмегенін түсіндірді. Ол Instagram парақшасында видео жариялап, бұл оқиға тұтас әулеттің жүрегіне түскен ауыр жара екенін жеткізді.
"Кейде өмір адамға ең ауыр сабақты бөтеннен емес…
Өз қаныңнан береді…
Бір әкенің маңдай терімен өсірген 8 ұлы мен 4 қызы…
Бір шаңырақтан тараған үлкен әулет…
Бір дастарханда отырған бауырлар…
Ал бүгін…
Сол әулеттің жүрегі қан жылап отыр.
90 жыл ғұмыр кешкен қария…
Қанша қиындықты артқа тастады.
Балаларын жеткізді.
Немере-шөберенің қызығын көремін деп өмір сүрді.
Қартайғанда сүйенішім – өз балаларым болады деп сенді.
Ата – әулеттің тамыры.
Ата – шаңырақтың шырағы.
Ата – өткеннің тарихы, бүгіннің батасы, ертеңнің аманаты.
Тамырына балта шабылған ағаш қанша биік болса да, бір күні құлайды.
Әулет те дәл солай…
Атаға түскен ауырлық – бір адамның ғана қайғысы емес.
Ол – тұтас әулеттің жүрегіне түскен жара.
Біз бұл видеоны ешкімді қаралау үшін емес…
Әр адамның жүрегіне ой салу үшін бөлісіп отырмыз.
Осындай жаста адамға байлық та, атақ та керек емес.Оған тек баласының жылы сөзі…
Немересінің құшағы…
Отбасының амандығы ғана керек.
Өкінішке қарай…
Кейде адамның жүрегін бөтен емес, өз жақыны ауыртады.
Бірақ біз ешкімге өш емеспіз.
Бізге кек керек емес.
Бізге жанжал керек емес.
Бізге тек атамыздың жүрегіндегі жараның жазылғаны керек.
Ата құласа – бір адам ғана құламайды.
Бүкіл әулеттің рухы шайқалады.
Ата жыласа – бір жүрек емес, тұтас ұрпақтың жүрегі сыздайды.
Ертең бәріміз де қартаямыз…
Бәріміз де баламыздан мейірім күтеміз.
Сол күн келгенде бүгін жасаған ісіміз алдымыздан шығады.
Бүгін ата-анамызды қадірлейік.
Барында бағалайық.
Жылы сөзімізді айтып үлгерейік.
Ертең кеш болып қалмасын…
Алла ешбір шаңыраққа мұндай сынақ бермесін.
Әр әулетке бірлік, әр балаға сана, әр ата-анаға құрмет нәсіп етсін.
Атамыздың жүрегі тыныш, ғұмыры ұзақ болсын.
Әумин", — деп жазды немересі.
Еске салайық, бұған дейін әлеуметтік желіде қарияның азапталғаны туралы видео тарап, қоғамда резонанс тудырған болатын. Атырау облыстық полиция департаменті 19 маусымда «ұрып-соғу» бабы бойынша қылмыстық іс қозғағанын мәлімдеді.
Соңғы жаңалықтар
