Үндістан мен Пәкістан арасында 100-ден аса ұшақ қатысқан ірі әуе шайқасы болды

Үндістан мен Пәкістан 100-ден астам ұшақтың қатысуымен ең ірі әуе шайқасына қатысты, деп хабарлайды CNN телеарнасы Пәкістан қауіпсіздік қызметінің жоғары лауазымды өкіліне сілтеме жасай отырып.

Шайқас 7 мамырға қараған түні Үндістан мен Пәкістан Әскери-әуе күштері арасында болды.

Оның мәліметінше, қақтығысқа екі елдің 125 жауынгерлік ұшағы қатысқан. Шайқас бір сағаттан астам уақытқа созылды, бұл ретте жойғыш ұшақтар ұлттық әуе кеңістігі шегінде әрекет етіп, шекараны кесіп өткен жоқ. Екі тарап та 160 шақырымға дейінгі қашықтықтағы зымырандармен оқ атты.

Пәкістан тарапы бес үнді жойғыш ұшағын атып түсіргенін мәлімдеді, алайда Нью-Делиден бұл ақпарат әлі ресми түрде расталған жоқ. CNN дереккөзі екі ел де ұшқыштарды тұтқынға алуға жол бермеу үшін шекараны кесіп өтуден аулақ болды деп болжады, бұл елеулі саяси салдарға әкелуі мүмкін еді.

Әуе шайқасы қақтығыстың кеңеюінің бір бөлігі болды. Осыған дейін Үндістан армиясы Пәкістанның Пенджаб аймағындағы және Исламабад бақылауындағы Кашмир аумағындағы нысандарға әуе соққыларын жасады. Бұл әрекеттер Пахалгам қаласында 26 адамның өмірін қиған терактіге жауап болды. Үндістан «Синдур» атты әскери операцияны бастады.

Пәкістан билігі Үндістанның әрекеттерін «агрессия актісі» деп атап, өз тарапынан соққылармен жауап берді. Бұл ретте Исламабад терактіге қатысы бар екенін жоққа шығарып, егер Үндістан одан әрі шабуылдардан бас тартса, эскалацияны тоқтатуға дайын екенін мәлімдеді.

Кейінірек екі тарап та соққылар алмасу нәтижесінде ондаған адамның қаза болғанын хабарлады. Жағдай әлі де шиеленісті болып тұр.