Үш бала мен әкенің өлімі: сот жүргізушіні ақтады

Ақтөбе облысында әке мен үш баланың өліміне әкелген жол-көлік оқиғасы бойынша жүк көлігінің жүргізушісі ақталды. Алқабилер оның әрекеттерінен қылмыс құрамы табылмағанын мәлімдеді, деп хабарлайды Politico.kz.

Қайғылы оқиға 2023 жылдың 21 ақпанында Айтекеби ауданындағы Самара – Шымкент тасжолында болған. Mitsubishi Montero Sport автокөлігі мен Volvo жүк көлігі соқтығысқан. Жол талғамайтын көлікті әйел адам басқарған.

Апат салдарынан оның жолдасы мен үш кәмелетке толмаған баласы қаза тапты.

Алғашында тергеу әйелді айыптаған. Алайда сот оның кінәсі дәлелденбеген деген қорытындыға келген. Нұсқалардың бірі бойынша, жүк көлігі қарсы жолаққа шығып кеткен болуы мүмкін деген болжам айтылған.

Кейін айып Volvo жүк көлігінің жүргізушісіне тағылды. Тергеу апатқа жүк көлігінің қарсы жолаққа шығуы себеп болды деп есептеген.

Іс алқабилердің қатысуымен қаралып, олардың көпшілігі жүргізушіні кінәсіз деп таныды. Нәтижесінде сот оның әрекеттерінен қылмыс құрамы жоқ деп шешіп, ақтау үкімін шығарды.

Сонымен қатар сот тергеу барысында жіберілген бірқатар заңбұзушылықтарға қатысты жеке қаулы шығарды.

Айта кетейік, сот үкімі әзірге заңды күшіне енген жоқ.