Зеленский мен Келлог Киевте келіссөздер өткізді

20 ақпанда АҚШ президенті Дональд Трамптың Украина және Ресей жөніндегі арнайы өкілі Кит Келлог бейсенбі күні Киевте Украина президенті Владимир Зеленскиймен кездесті, деп хабарлайды POLITICO.KZ, golosameriki сайтына сілтеме жасап.

Украина президенті кеңсесінің хабарлауынша, америкалық тараптың өтініші бойынша бірлескен баспасөз конференциясы өтпейтін болды.

АҚШ-тың жаңа әкімшілігі Украина мен Ресей арасындағы соғысты мүмкіндігінше тез аяқтауды көздейді. Трамп әкімшілігінің пікірінше, келіссөзсіз бұл қақтығысты тоқтату мүмкін емес.

Вице-президент Джей Ди Вэнс бейсенбі күні соғыстың аяқталуы жақын екенін айтты. Оның пікірінше, бұл тек Ресеймен келіссөз жүргізу арқылы жүзеге асуы мүмкін.

Киевке сәрсенбі күні келген Кит Келлог Украина билігін тыңдау үшін келгенін мәлімдеді. Бірақ оның сапарының негізгі мақсаты АҚШ ұсынған пайдалы қазбалар жөніндегі келісімді талқылау болуы мүмкін, дейді сарапшылар.

Трамптың ұлттық қауіпсіздік жөніндегі кеңесшісі Майк Уолтц Киевті АҚШ-қа қатысты сынын азайтуға және жаңа келісімге қол қоюға шақырды.

"Олар АҚШ-ты сынауды тоқтатып, жағдайды дұрыс бағалап, бұл келісімге қол қоюы керек", – деді ол Fox News арнасында сөйлеген сөзінде.

Бұл уақытта Еуропалық елдер қорғаныс шығындарын арттыруға уәде берді. Кейбір мемлекеттер АҚШ-тың қолдауымен Украинаға бітімгерлік күштерін жіберу мүмкіндігін қарастырып жатыр.

НАТО бас хатшысы Марк Рютте Ресейдің Украина жерін қайта басып алмауы үшін сенімді қауіпсіздік кепілдіктері қажет екенін атап өтті.

"Бәрі әлі шешілген жоқ, бірақ Еуропа Украинадағы бейбітшілікке қол жеткізуде шешуші рөл атқарады", – деді Рютте Братиславада өткен баспасөз мәслихатында.