Зеленский: Қытай азаматтары Ресей жағында соғысып жүр

Украина президенті Владимир Зеленский Донецк облысындағы ұрыстар кезінде Ресей жағында соғысқан екі Қытай азаматының тұтқындалғанын мәлімдеді, деп хабарлайды POLITICO.KZ Bloomberg басылымына сілтеме жасап.

Бұл – үш жылға созылған қақтығыс кезінде Қытай азаматтарының тұтқындалған алғашқы жағдайы. Зеленскийдің айтуынша, олар Украина аумағында қолға түскен. Мемлекет басшысы сыртқы істер министрі Андрей Сибихеге осы оқиғаға байланысты Қытай әріптесімен дереу байланыс орнатуды тапсырды.

Қытайдың Сыртқы істер министрлігі жұмыс уақытынан тыс кезде түсініктеме бермеді.

Солтүстік Кореядан айырмашылығы, Қытай Ресейге ресми түрде әскер жібермеген. Алайда бұған дейін кейбір қытайлық азаматтардың ерікті түрде Ресей армиясына қосылғаны туралы хабарланған еді.

Зеленский бұл жағдайдың бұрынғы оқиғалардан ерекшеленетінін атап өтті. "Біз күшті елміз, бірақ бірнеше елмен бір уақытта соғыса алмаймыз, әрқайсысы біздің жерімізден бір нәрсе алғысы келеді", – деді ол Киевте журналистерге берген сұхбатында.

Ресей мен Қытай 2022 жылдың ақпанында Украинадағы қақтығыс басталар алдында "шекарасыз серіктестік" орнатқан болатын. Содан бері Қытай президенті Си Цзиньпин Владимир Путинге дипломатиялық және экономикалық қолдау көрсетіп келеді.

Сонымен қатар Пекин АҚШ санкцияларын бұзатын өлімге әкелетін қару жеткізуге бармағанын және қақтығысты тоқтату жолында күш салуға дайын екенін мәлімдеді.

"Бұл Ресейдің Украинаға жасаған шабуылына әскери қолдау көрсетіп отырған тағы бір ел", – деді Зеленский. – "Алдымен Иран, кейін Солтүстік Корея әскерлері болды. Бірақ айырмашылық бар: солтүстіккореялықтар Курск маңында бізге қарсы соғысты. Ал қытайлықтар Украина аумағында соғысып жатыр. Бұл – серіктестерімізбен шұғыл талқылауды қажет ететін маңызды мәселе".