Жас әйел жүктілік кезінде кенеттен қартайып кетті

Малайзия тұрғыны жүктілік кезінде болған таңғаларлық өзгерісін әлеуметтік желіде жариялап, жұртты шошытты. Фотосуреттерде 28 жастағы әйелдің жүзі терең әжімдерге, қабынуларға және іріңді бөртпелерге толып, жасының бірнеше онжылдыққа ұлғайғанындай көрінеді.

Маркетинг бөлімінің менеджері болып жұмыс істейтін Фарах Файзал өз тәжірибесін TikTok желісінде бейнеролик арқылы бөлісті. Видео бірнеше күн ішінде 100 миллионнан астам қаралым жинап, желіде үлкен талқылау тудырды және медициналық мамандардың назарын аударды.

«Күн сайын таңертең бетімде жаңа бөртпелер пайда болатын. Терім қышып, күйіп, қабынып тұрды. Айнаға қарасам, өзімді танымай қалатынмын», – дейді Фарах өз естелігінде.

Бәрі күтпеген жерден басталған: бұрын қолданған тері күтімі құралдары әсер етпей қалды, ал жағдайы күн өткен сайын нашарлады. Терісі дөрекіленіп, мұрны мен құлағы үлкейіп, іріңді бөртпелер мен жасы келген адамға тән терең әжімдер пайда болды.

Мұндай өзгерістердің эмоционалдық салдары да ауыр болды. Фарах суретке түспеуге тырысып, үйден тек бетпердемен шығатын. Өзін-өзі бағалауы төмендеп, психологиялық жағдайы нашарлады.

«Бұл өмірімдегі ең ауыр әрі күйзеліске толы кезең болды. Денемде не болып жатқанын түсінбедім, бұл мені қатты қорқытты», – дейді жас ана.

Осы қиын сәтте Фарахтың ең үлкен тірегі – оның жары болды. Ол жұбайын сабырға шақырып, бойындағы сұлулығы мен мықтылығын үнемі еске салып, сырт келбеттегі өзгерістерге қарамастан сүйіспеншілігін білдіріп отырды.

Бақытымызға орай, сәби дүниеге келгеннен кейін Фарахтың жағдайы айтарлықтай жақсарған. Қабыну дерті дерлік басылып, терісі біртіндеп бұрынғы қалпына келе бастады. Дегенмен, қалпына келу процесі әлі де жалғасуда.

Дерматолог, доктор Закари Рубин бұл жағдайдың себебі жүктілік кезінде дамуы мүмкін сирек тері ауруы – rosacea fulminans немесе pyoderma faciale болуы ықтимал екенін айтты. Бұл розацеаның агрессивті түрі бетте қызарған түйіншектердің пайда болуымен сипатталады. Ауру кенеттен дамиды, бір жылға дейін созылуы мүмкін және антибиотиктер немесе стероидтармен емдеуді қажет етеді.

Малайзиялық Sinar Daily басылымының дерегінше, жүктілік кезінде эстроген мен прогестерон сияқты гормондар теріде түрлі өзгерістер тудыруы мүмкін: бөртпелерден бастап, пигментацияның күшеюіне және терінің сезімталдығына дейін.