Жасанды интеллект тарихи тұлғаларды «тірілтті»
Қазақстандық азамат Бақдәулет Бекжанов жасанды интеллект көмегімен танымал тарихи және мәдени тұлғалардың шынайы келбетін жасап көрсетті, деп хабарлайды POLITICO.KZ.
Ол бұл жұмысында ескі ұлттық валюта – 1, 3, 5, 10, 20, 50 және 100 теңгелік купюраларда бейнеленген тұлғалардың суреттерін пайдаланған. Жобада Шоқан Уәлиханов, Абай Құнанбайұлы, Абылай хан, Әбілхайыр хан, Құрманғазы Сағырбайұлы, Сүйінбай Аронұлы мен Әл-Фарабидің бейнелері қамтылған.
Бекжанов нейросеть арқылы тек бет әлпетті ғана емес, сонымен қатар киімнің тарихи ерекшеліктерін, матаның құрылымын және түстердің үйлесімін де жандандыра алған.
«Жасанды интеллекттің көмегімен тұлғалардың бет пішіні, киімдегі ұсақ-түйек детальдар және тарихи контекст сақталған күйде түрлі-түсті бейнелер жасалды. Бұл – тарихты тірілтіп, шабыттандыратын жұмыс болды», – деп жазды автор.
Жоба әлеуметтік желі қолданушылары арасында кеңінен таралып, қазақстандықтардың қызығушылығын тудырды. Көпшілік мұны «тарихқа деген жаңа көзқарас» деп бағалады.
Соңғы жаңалықтар
