Жүкті әйелдің мәйітін жертөледен тапқан: Іс туралы сұмдық ақпарат шықты

Жамбыл облысында жүкті әйелдің қайғылы қазасы қоғамда үлкен резонанс тудырды. 25 жастағы келіншек Әдемі жүктілігінің 33-аптасында Шу қалалық ауруханасына түскеннен кейін, бірнеше аптадан соң көз жұмды. Осы жағдайға байланысты марқұмның отбасы журналист Руслан Өтепбайға сұхбат беріп, медициналық қызметкерлердің салғырттығы мен дер кезінде көмек көрсетпегеніне шағымданды, деп хабарлайды POLITICO.KZ Alash.kz сайтына сілтеме жасап.

Отбасының айтуынша, 9 наурыз күні Әдемі ауруханадағы әжетханада қысымның жоғарылауынан есінен танып, құлап қалған. Алайда сол сәтте оған қажетті алғашқы көмек көрсетілмеген. Туыстарының сөзіне сүйенсек, келіншек жарты сағатқа жуық қараусыз жатып қалған. Бұл уақыт ішінде құрсағындағы баланы дәрігерлер шұғыл түрде алып тастаған, алайда анасының жағдайы күрт нашарлап, ол комаға түскен. Әдемі есін жимастан 22 наурызда көз жұмды.

Марқұмның ата-анасы мен жұбайы бұл жағдайға дәрігерлерді тікелей кінәлайды. Олар медициналық қызмет сапасына күмән келтіріп, әділдік талап етуде. Жақындарының айтуынша, аурухана тарапынан болған бейқамдық әйелдің өмірін жалмаған. Ең сорақысы, күйеуі жұбайының денесін белгісіз бөлмедегі жертөледен тауып алған.

Бұл оқиға медициналық мекемелердегі бақылау мен жауапкершілік мәселесін қайта күн тәртібіне шығарды. Қоғам әділ тергеу жүргізіліп, кінәлілердің жауапқа тартылуын талап етуде. Ал марқұмның отбасы – тек шындық пен әділдіктің орнауын қалайды.