Астанада V Дүниежүзілік көшпенділер ойындарына арналған өңірлер шеруі өтті

Астанадағы ЭКСПО аумағында Қазақстанның 20 өңірінен 200-ден аса өкілдің қатысуымен «Бірлік керуені» атты ауқымды іс-шара өтті. Спортшылардан, батырлардан және қоғам қайраткерлерінен құралған керуен әр өңірдің дәстүрлі стилінде безендіріліп, шеру жасады, деп жазды елорда әкімдігінің ресми сайты. Керуеннің басты міндеті – өңірлерден елордаға ойындар тарихының ажырамас бөлігі саналатын қасиетті суды ойындардың ашылу салтанатына жеткізу. «Бірлік керуені» 5-ші Дүниежүзілік көшпенділер ойындарының ашылу салтанатының басты киелі элементі ретінде қасиетті суды пайдалану дәстүрін жалғастырады. Кеше сағат 16:00-ден бастап, ЭКСПО аумағында елорда тұрғындары мен қонақтары алдында ди-джей өнер көрсетіп, интерактивті ойындар өткізілді. Одан әрі сағат 17:00-де театрландырылған бағдарламамен және 20 өңірден келген өкілдердің шеруі арқылы ресми ашылу өтті. Қатысушылар мен көрермен алдында Астана қаласының әкімі Жеңіс Қасымбек пен Спорт және туризм министрі Ербол Мырзабосынов құттықтау сөз сөйледі. Іс-шара барысында керуен еліміздің барлық өңірінен жиналған қасиетті суды Астанаға жеткізді. Бұл су Қазақстан халқының ортақ күші мен бірлігін білдіреді. Шеруді шығармашылық ұжымдар мен қазақстандық эстрада әншілері жалғастырды. Іс-шара барысында Royal beats барабаншылар ансамблі, «Жошы» тобы, сондай-ақ Aro, Қуандық Рахым, Маржан Арапбаева, Ғазизхан Шекербек, Ақбота Керімбекова, Ayree, Мирас Жүгінісов және «Бәйтерек» тобы секілді өнер иелері концерт өткізді. Еске сала кетсек, осыған дейін еліміздің әр өңірінің киелі саналатын бұлақ көзінен торсық толы су жиналған болатын. Дәл осы су 5-ші Дүниежүзілік көшпенділер ойындарының ашылу салтанатының негізгі элементі болмақ. Айта кетейік, 5-ші Дүниежүзілік көшпенділер ойындары Астанада 8-13 қыркүйек аралығында өтеді. Оған әлемнің 89 елінен 2 500-ден аса адам қатысады.