2027 жылғы киберспорттан әлем чемпионаты Астанада өтеді

2027 жылы киберспорттан әлем чемпионаты (World Esports Championship) Астанада өтеді, деп хабарлайды Politico.kz.

Елордада Халықаралық киберспорт федерациясы (IESF), ҚР Туризм және спорт министрлігі және Қазақстан киберспорт федерациясы (QCF) арасында ресми келісімшартқа қол қойылды. Осы құжат аясында елордаға 150-ден астам елдің өкілдері келеді деп күтілуде. Дүниежүзілік додада спортшылар Counter Strike 2, Dota 2, Mobile Legends – Bang Bang, PUBG MOBILE, eFootball және Tekken ойындары бойынша бақ сынайды.

«Бұл – чемпионат өткізу ғана емес, халықаралық серіктестікті нығайту және киберспорт әлемін бірге дамыту мүмкіндігі», – деді Халықаралық киберспорт федерациясы.

Ұйымдастырушылардың сөзіне қарағанда, жарыстың нақты күндері, іріктеу кезеңдері, квоталар мен регламенті алдағы уақытта жарияланады.