Пәтерін жалға берген астаналық 4 айдан бері үйіне кіре алмай жүр

Пәтерін жалға берген астаналық тұрғын енді өз үйіне кіре алмай жүр. Айтуынша, жалға алушы бірнеше айдан бері ақы төлемей, баспананы босатудан бас тартқан. Оның үстіне, үйде кәмелетке толмаған бала бар. Мәселені заң аясында шешуге тырысқан келіншек тіпті сотқа да жүгінген. Бірақ ол соттың арызын қанағаттандырмағанына наразы, деп хабарлайды Politico.kz.

Бұл туралы 31-арнаның "Информбюро" ақпараттық бағдарламасы хабарлады. 

Айгүл есімді астаналық тұрғын әлеуметтік желіде пәтерін шілде айында баласы бар әйелге жалға бергенін жазған. Келісім бойынша жалдау ақысы мен депозит төленуі тиіс болған. Алайда жалға алушы алғашқы төлемнің бір бөлігін ғана беріп, кейін ақша аударуды тоқтатқан. Үй иесі қарызды өтеуді және пәтерді босатуды талап еткен. Нәтиже болмаған соң сотқа жүгінген.

«Жалға алушы төрт айдан бері тұрып жатыр. Осы уақытқа дейін алғашқы айдың ақысын да толық өтеген жоқ. Пәтерді босатудан бас тартып қана қоймай, үйді тексеруге де кіргізбейді. Полицияның да қолынан ештеңе келмейді. Конституцияға енгізілген өзгерістерге сәйкес, сот шешімінсіз ешкімді пәтерден шығара алмаймыз. Сот мәселені үш ай бойы қарады, апелляциялық сотқа да жүгіндік, бірақ соңында талап-арызымыз қанағаттандырылмады», — деп жазды үй иесі әлеуметтік желідегі парақшасында.

Яғни, пәтер өзінікі болғанымен, иесі жалға алушыны күштеп шығара алмайды. Ал үйде бала болғандықтан, мұндай дауда оның да құқығы ескеріледі. Заң бойынша кәмелетке толмаған жанның тұрғын үй құқығына қатысты мәселелер мамандандырылған кәмелетке толмағандар істері жөніндегі соттың қарауына жатады.

Заңгер Жандос Тұяқов соңғы жылдары мұндай жайттардың көбейгенін айтады. Сотқа жүгінген күннің өзінде іс бірнеше айға созылуы мүмкін. Оған апелляция уақыты қосылса, үй иесі баспанасын қайтарып алғанша төрт-бес ай өтіп кетеді. Сондықтан заңға өзге елдердегідей қатаң талаптар енгізу қажет дейді ол.

«Мысалы, Англияны алайық. Ол жақта сіз міндетті түрде: „Осындай жерде жұмыс істеп жатырмын“, — деп, жұмыс орнынан анықтама әкеліп бересіз. Оған қоса, кез келген жалға беруші салық төлейді. Сол себепті оларда мемлекет тарапынан бақылау, яғни ықпал ету күші мықты. Кез келген жалға алушы өзінің fractional жағдайын міндетті түрде көрсетуі керек. Сол себепті біздің заңға да осындай өзгерістер енгізу қажет деп ойлаймын», — деді заңгер Жандос Тұяқов.

Мұндағы мақсат — үй иесінің құқығын қорғау, бірақ сонымен бірге сот бақылауын және бала сияқты осал топтардың мүддесін сақтау. Ал мұндай жағдайға тап болмас үшін мамандар жалға беру келісімшартын дұрыс рәсімдеп, төлемдердің бәрін құжатпен бекітуді, ал қарыз жиналған жағдайда сотқа дейінгі талапты жазбаша жолдауды ұсынады.