2028 жылдан бастап қазақстандық ұлдарға адам папилломасына қарсы вакцина салынады

Қазақстанда 2028 жылдан бастап ұл балалар да адам папиллома вирусына (АПВ) қарсы вакцина ала бастайды, деп хабарлайды Politico.kz.

Санитариялық-эпидемиологиялық бақылау комитетінің мәліметінше, АПВ-ға қарсы вакцинация жыныс сүйелдерінің, анус пен жыныс мүшелері қатерлі ісігінің алдын алуға мүмкіндік береді.

Мамандардың айтуынша, ұлдарды вакцинациялау вирустың таралуын азайтып, әйелдерге де жанама қорғаныс қалыптастырады. Осылайша АПВ-мен байланысты аурулардың жалпы деңгейін төмендету көзделіп отыр.

Алайда Қазақстанда әзірге 18 жастан асқан әйелдерге арналған тегін АПВ вакцинациясы бағдарламасын кеңейту жоспары қарастырылмаған.

Еске салайық, Қазақстанда қыз балаларды адам папиллома вирусына қарсы вакцинациялау 2024 жылдан бастап енгізілген болатын.