"30 жылда қаусап қалған". Саясат Нұрбек ғылым саласындағы өзгерістер туралы айтты

ҚР Ғылым және жоғары білім министрі Саясат Нұрбек ғылым саласындағы бірқатар жетістіктермен бөлісті, деп хабарлайды "Адырна" тілшісі 1001 түн бағдарламасына сілтеп.

Өткен жылдың маусымында Қазақстанның білім және ғылым министрлігі екіге бөлінді. Ғылымжәне жоғары білім министрі болып сайланған Саясат Нұрбек екі жылға жуық уақыт көлемінде атқарылған жұмыстармен бөлісті.

1001 түн бағдарламасына берген сұхбатында министр Білім министрлігінің екіге бөлінуі ең дұрыс шешім болғанын айтады. Себебі министрлік екі жаңа департаментке бөлінгеннен соң оқу орындарындағы білім саласы, ғылыми зертханалардың жағдайы, арнайы жобалар министрдің жеке бақылауында болған.

"Өкінішке орай, жағдай қиын, проблемалар жиналып қалған. Соңғы 30 жылда әсіресе ғылым саласында жиналып қалған проблемалар өте көп. Бірақ министрліктің нақты сол проблемаларды шешуге уақыты да, зейіні де, кадры бар. Ең бастысы Президенттің қолдауы, әсіресе қаржы тұрғысынан бар. Бір ғана фактпен бастайын. Қазақстанда Отандық ғылым соңғы 30 жылда қаусап, қаржыландырудан тыс қалған. Сондықтан Президенттің қолдауымен келесі 3 жылдағы ғылыми зерттеулерге, жобаларға, ізденістерге 643 млрд теңге бөлінді. Бұл 30 жылдың ішінде болмаған жағдай! Біз ЖІӨ 100-ден 25%-ға жетіп отырмыз. Әлемдік, халықаралық тәжірибеде ғылымыңызды сақтап қалғыңыз келсе 1%-ға жеткізу керек. Біз екі жыл көлемінде осы жетістікке жеттік. Әлі де бұл статистиканы арттыруға үміт бар", - деді министр.

"Онкологиялық препаратымыз болады, Қазақстанда жасалған. Алматыдағы онкология және радиология ғылыми-зерттеу институтындағы 15 адамның еңбегі бар. Мұның да өзіндік сатысы бар. 1-2 жылдың ішінде өзімізде, Қазақстанда жасалған препаратымыз болады," - деді Саясат Нұрбек.

"Басты мақсатымыз саннан сапаға қарай көшу. Біздің жоғары оқу орындарындағы ұстаздар, профессорларымыздың жалақысы да өседі", - дейді министр.