Адамжегіш Жұмағалиев қамалған жындыхана тексерістен таза өтті

Алматы облысы Ақтас кентіндегі танымал адамжегіш Николай Жұмағалиев ұсталып отырған психиатриялық ауруханада пациенттерге қатыгездік көрсетіледі деген ақпарат расталмады. Бұл туралы еліміздің Денсаулық сақтау министрлігі мәлімдеді, деп хабарлайды Politico.kz.

Денсаулық сақтау министрі Ақмарал Әлназарованың тікелей тапсырмасымен басталған тексеруге әлеуметтік желілерде жарияланған түрлі шағымдар түрткі болған.

Медициналық және фармацевтикалық бақылау комитеті жіті бақыланатын мекемені тексеріп, науқастарға физикалық шектеу қою, оларды дәрі-дәрмекпен қинау немесе ар-намысына тию фактілерін анықтаған жоқ. Ведомство мәліметінше Instagram желісінде тараған жазба авторы осыдан 18 жыл бұрын, яғни 2008 жылы болған оқиғаларды сипаттаған және онда нақты адамдардың деректері көрсетілмеген.

Тамыздың 7 күні шығарылған ресми актіге сәйкес аталған мекемеде заңбұзушылық жоқ екені дәлелденді. Осы орайда Денсаулық сақтау министрлігі әрбір пациенттің құқығы мен қауіпсіздігі басты назарда екенін атап өтіп, қоғамда көрінеу жалған мәлімет таратқандар заң алдында жауапқа тартылатынын қатаң ескертті. Бұдан бөлек құзырлы орган дәрі-дәрмекпен қамтамасыз ету және медициналық-әлеуметтік көмек сапасын бақылауды жалғастыра беретінін мәлімдеді.

Қоғам назары бұл жабық мекемеге жақында ғана ауған еді. Бұған дейін YouTube желісінде осында жарты ғасырға жуық уақыт мәжбүрлі ем алып жатқан Николай Жұмағалиевтің бейнесұхбаты жарияланып, ол жеке кеңістіктің жоқтығына, палатада ұзақ қамалып отыратынына және таза ауаға шығу мүмкіндігінің аздығына шағымданған болатын.

Еске салайық, «Темір азу» лақап атымен танылған ол 1979 бен 1990 жылдар аралығында кем дегенде 10 әйелді айуандықпен өлтіріп, етін жегені үшін ұсталған. Сот-психиатриялық сараптамасы оны шизофрениямен ауырады деп танып, түрме жазасын мәжбүрлі емдеуге ауыстырған. Қылмыскер 1989 жылы арнайы емханадан қашып кетіп, тек 1991 жылдың қаңтарында Ферғана алқабында қайта қолға түскен және содан бері Ақтастағы қатаң бақылаудағы клиникада ұсталып отыр.