Алматыда ҚазҰУ-да студенттер мен оқытушылар шұғыл эвакуацияланды

ҚазҰУ-да күмәнді сөмкеге байланысты студенттер мен оқытушылар эвакуацияланды, деп хабарлайды Politico.kz.

Алматыдағы әл-Фараби атындағы Қазақ ұлттық университетінде қараусыз қалған сөмке табылып, студенттер мен оқытушылар ғимараттан эвакуацияланды. 

Қалалық жедел қызметтер оқиға орнына барып, тексеру жүргізді. Бұл туралы Алматы қаласы Полиция департаментінің баспасөз қызметі хабарлады.

Полиция мәліметінше, оқу орнынан қараусыз қалған сөмке табылғаны туралы хабар түскен бойда жедел қызметтер оқиға орнына жеткен. Қауіпсіздікті қамтамасыз ету мақсатында білім алушылар мен оқытушылар эвакуацияланған.

Мамандар сөмкені тексеру кезінде оның студенттердің біріне тиесілі екенін және ішінде оқу құралдары барын анықтады. Нәтижесінде сөмкенің ешқандай қауіп төндірмейтіні белгілі болды.

Алматы полициясы азаматтарға қауіпсіздік мәселелеріне жауапкершілікпен қарап, күмәнді заттарды байқаса, тиісті қызметтерге хабарлағаны үшін алғыс білдірді.

Сонымен қатар полиция өкілдері қараусыз қалған немесе күдік тудыратын заттарды байқаған жағдайда, оларға жақындамауға, ұстамауға және орнынан қозғамауға кеңес берді. Мұндай жағдайда дереу 102 нөміріне хабарлау қажет.