Астанада 10 мың студентке арналған британдық Кардифф университетінің жаңа кампусы салынады

Ұлыбританияның жетекші Кардифф зерттеу университеті Астанадағы алғашқы академиялық жылын қорытындылап, жаңа студенттер қалашығының құрылысы туралы жоспарын жариялады, деп хабарлайды Politico.kz.

Уэльстен келген делегацияның ресми сапары аясында Кардифф университетінің президенті Венди Ларнер бірінші курс студенттерімен кездесті. Жиынға Ғылым және жоғары білім министрі Саясат Нұрбек пен Ұлыбританияның Қазақстан Республикасындағы елшісі Салли Аксворти қатысты. Іс-шараның басты жаңалығы ретінде елордадағы жаңа кампустың тұсаукесері өтті.

Қазақстан үкіметінің қолдауымен қала әкімдігі елорданың сол жағалауынан 20 гектар жер телімін бөлді. Бұл аумақ ЭКСПО көрме орталығына, Назарбаев Университетіне және Астананың Бас мешітіне жақын маңда орналасқан. Жоба 2028 жылға қарай толық аяқталып, бір мезетте 10 мың студенттің оқуына және тұруына арналған жоғары технологиялық қалашыққа айналмақ. Бұл аумақ елорданың ірі білім беру кластерін одан әрі кеңейте түспек.

Халықаралық стандарттарға сай кешенде заманауи оқу ғимараттары, зерттеу зертханалары, спорт нысандары мен жайлы тұрғын үйлер салынады. Сонымен қатар жаңа кампуста дәстүрлі дәріс амфитеатрларынан толық бас тартып, командалық жұмыс пен эксперименттік оқытуға арналған икемді кеңістіктер құру жоспарланып отыр.

Тұсаукесер барысында Кардифф университетінің президенті алғашқы шетелдік филиалды неліктен Қазақстаннан ашқанын түсіндірді.

"Біз мұнда үлкен мүмкіндіктер мен биік мақсатты елді көрдік. Бізге Қазақстан Үкіметінің көзқарасы өте ұнады, ал біздің мықты жергілікті серіктесіміз ортақ көзқарас, ұзақ мерзімді жоспарлар мен біртұтас құндылықтар төңірегінде күш біріктіруге көмектесті. Қазақстан экономикалық, әлеуметтік және мәдени жоспарларда қарқынды дамып келеді және біз ұзақ жылдар бойы осы өсімнің бір бөлігі болғымыз келеді. Бірінші жылдың нәтижелері біздің алғашқы халықаралық филиалымызды Қазақстанда салу туралы шешімнің дұрыс болғандығын толық растайды", – деді Венди Ларнер.

Сондай-ақ профессор қазақстандық студенттердің өте ақылды екенін, олардың тілдік дағдылары мен мықты базасы оқу бағдарламасын күтілгеннен жылдам меңгеруге мүмкіндік бергенін жеткізді. Оның айтуынша, бір жыл ішінде жастар толыққанды жұмыс істейтін студенттер одағын құрып, 26 қызығушылық клубын ашып үлгерген.

Қазақстан Кардифф университетінің академиялық мәселелер жөніндегі Вице-Провосты Талғат Жүсіпбек оқу процесін британдық стандарттармен үндестіру сәтті өткенін айтты.

"Бірінші оқу жылының сәтті аяқталуы Қазақстандағы күрделі Британдық академиялық модельдің интеграциясы жоғары деңгейде өткенін дәлелдейді. Біздің алғашқы 1000 студент Кардиффтің әлемдік ғылыми-зерттеу базалары мен электронды кітапханаларына қол жеткізді. Жоба толығымен жүзеге асырылды, өзінің тұрақтылығы мен тиімділігін көрсетті. Жаңа кампус салу жобасы бұл бағдарламаларды масштабтауға, жоғары технологиялық зертханаларды іске қосуға және халықаралық деңгейдегі мамандарды тікелей ел ішінде дайындауға мүмкіндік беретін жаңа кезең", – деді Талғат Жүсіпбек.

«Russell Group» қатарына кіретін және Ұлыбританияның ең ірі зерттеу орталықтарының бірі саналатын Кардифф университеті елордада ұзақ мерзімді білім беру хабын құруды көздеп отыр. Филиал түлектері аймақтық ескертпелерсіз стандартты халықаралық диплом алады. Бұл оларға жаһандық бизнес ортаға, ғылымға және мемлекеттік басқару жүйесіне кедергісіз араласуға үлкен жол ашады.

Айта кетейік, 2026 оқу жылында өз қызметінің бірінші жылын сәтті аяқтаған Қазақстандағы кампус оқу бағдарламалары мен әріптестік бастамаларын одан әрі кеңейтуді жалғастырып жатыр. Оқу орны әлемнің 100-ден астам елінен студенттер қабылдап, мемлекеттік органдармен және бизнес өкілдерімен белсенді жұмыс істеуді көздейді.