Қасым-Жомарт Тоқаев Франк-Вальтер Штайнмайерді «Алтын Қыран» орденімен марапаттады

Мемлекет басшысы Қасым-Жомарт Тоқаев Германияның Федералдық Президенті Франк-Вальтер Штайнмайерге Қазақстанның жоғары мемлекеттік наградасы — «Алтын Қыран» орденін табыстады. Ел Президенті неміс көшбасшысының екі мемлекет арасындағы достық пен ынтымақтастықты нығайтуға қосқан жеке үлесін жоғары бағалады, деп хабарлайды Politico.kz.

Қасым-Жомарт Тоқаев Қазақстан тарапы Франк-Вальтер Штайнмайерді сенімді дос әрі халықаралық деңгейдегі көрнекті мемлекет қайраткері ретінде құрметтейтінін атап өтті. Салтанатты түрде табысталған бұл орден — қазақ халқының неміс халқының басшысына деген ықыласы мен алғысының нышаны.

Өз кезегінде Франк-Вальтер Штайнмайер Қазақстанның және ел халқының өзі үшін орны бөлек екенін білдірді. ГФР Президенті екі елдің бірлескен күш-жігері арқылы бұдан да жоғары нәтижелерге қол жеткізе алатынына тоқталып, Қазақстан мен Германия арасындағы әріптестіктің ұзақ мерзімді әрі берік сипатына кәміл сенім білдірді.