Атыраудағы жоғалған отбасы: күдіктіге қатысты тың дерек мәлім болды
Атырау облысы Қызылқоға ауданына қарасты Жангелдин ауылында тіркелген ауыр қылмысқа қатысты тергеу әлі аяқталған жоқ. Ерлі-зайыптының қаза табуы және отбасының тағы екі мүшесінің із-түзсіз жоғалуы қоғамда үлкен алаңдаушылық тудырып отыр, деп хабарлайды Politico.kz.
Атырау облысы Қызылқоға ауданына қарасты Жангелдин ауылында тіркелген ауыр қылмысқа қатысты тергеу әлі аяқталған жоқ. Ерлі-зайыптының қаза табуы және отбасының тағы екі мүшесінің із-түзсіз жоғалуы қоғамда үлкен алаңдаушылық тудырып отыр.
Алдын ала мәліметтерге сәйкес, марқұм ерлі-зайыптылардың мәйіттері аула аумағындағы шаруашылық құрылыстан табылған. Тергеу органдары бұл дерек бойынша қасақана адам өлтіру нұсқасын негізгі бағыт ретінде қарастыруда. Қылмыстың бір адам немесе бірнеше тұлға тарапынан жасалғаны әзірге нақты анықталған жоқ. Сот-медициналық сараптама өлімнің нақты себебі, қылмыс уақыты және қолданылған заттар бойынша қорытынды беруі тиіс.
Іс аясында 29 жастағы күйеу бала Сұлтан Сәрсемалиев негізгі күдікті ретінде қарастырылып отыр. Тергеу барысында оның жақын туыстары жауап бергенімен, күдіктінің өзі, оның жұбайы және марқұмдардың үлкен қызының қазіргі қайда екені әлі белгісіз. Олар із-түзсіз жоғалғандар қатарында.
Құқық қорғау органдарына жақын дереккөздердің мәліметінше, бұл отбасы көпшілікпен араласа бермеген, тұйық әрі діндар өмір салтын ұстанған. Ауыл тұрғындарымен байланысы шектеулі болған, үйден сирек шыққан. Бес баланың анасы болған келіншекті тіпті жақын туыстары да жиі көрмеген. Ерлі-зайыптылардың ресми жұмыс істемеуі де күмән тудырғанымен, алдын алу шаралары уақытында қолға алынбаған.
Күдіктінің анасының айтуынша, ұлы кейде өзі байланысқа шығады, алайда қоңырауларға жауап бермейді. Ал бейресми дереккөздер мен әлеуметтік желілерде тараған мәліметтерге сәйкес, Сұлтан Сәрсемалиев шетелде болуы мүмкін. Атап айтқанда, оның Индонезия аумағында, соның ішінде Бали аралында жүргені және жоғалған әйелдердің бірінің банк картасын пайдалануы ықтимал деген ақпарат тараған.
Марқұм Максот Қарабалиннің әпкесі күйеу баланың ұзақ уақыт бойы жұбайының жағдайы мен жүрген жерін жасырып келгенін айтады. Оның сөзінше, отбасы қараша айынан бері хабарсыз кеткенімен, күдіктінің анасы полицияға дер кезінде жүгінбей, бес баланы өз үйінде қалдырған.
Құқық қорғау органдары Сұлтан Сәрсемалиевтің елден заңсыз кетуі немесе шетелде бой тасалауы мүмкін екенін жоққа шығармайды. Осыған байланысты жедел-іздестіру шаралары күшейтілген.
Қазіргі уақытта Атырау облыстық полиция департаменті тергеу мен іздестіру жұмыстарын жалғастырып жатыр. Алайда ресми органдар істің мүддесіне байланысты толық ақпаратты әзірге жариялаған жоқ.
Еске сала кетейік, бұған дейін 1959 жылы туған Максот Қарабалин мен Нәсіп Өтешқалиеваның мәйіттері табылып, қылмыстық іс Қылмыстық кодекстің «Адам өлтіру» бабы бойынша тіркелген. Ал отбасының тағы екі мүшесінің тағдыры әлі күнге дейін белгісіз.
Соңғы жаңалықтар
