Әйел зорлады деген күдікті депутат мандатынан айырыла ма – Мәслихат жауап берді

Түркістан облысында зорлау күдігіне ілінген Ерғали Аманбаев әзірге Бәйдібек аудандық мәслихатының депутаты болып қала береді, деп хабарлайды Politico.kz.

Бұл туралы аудандық мәслихат аппаратының Informburo.kz редакциясының сауалына берген жауабында айтылған.

Мәслихат өкілдерінің мәліметінше, олар қылмыстық іс бойынша құқықтық баға беруге немесе сотқа дейінгі тергеу барысына араласуға құқылы емес.

«Егер құқық қорғау органдары немесе сот депутаттың мәртебесіне әсер ететін процестік шешім қабылдайтын болса, Бәйдібек аудандық мәслихаты бұл мәселені өз құзыреті аясында және Қазақстанның қолданыстағы заңнамасына сәйкес қарайды», – делінген Informburo.kz редакциясының сауалына берілген жауапта.

Еске салайық, бұған дейін Түркістан облысының прокуратурасы Ерғали Аманбаевтың зорлау дерегі бойынша күдікке ілінгенін растаған болатын. Ал оған дейін полиция Шымкент қаласының тұрғыны ұсталып, соттың санкциясымен қамауға алынғанын хабарлаған еді.

Қазіргі таңда қылмыстық іс бойынша сотқа дейінгі тергеу амалдары жалғасып жатыр.

Айта кетейік, Ерғали Аманбаев бұған дейін Шымкенттегі жол қозғалысы ережесін өрескел бұзу оқиғасынан кейін де қоғам назарында болған. Шымкент қалалық сотының баспасөз қызметінің мәліметінше, 2025 жылы 22 тамыздағы сот шешімімен депутат көлік жүргізу құқығынан бір жыл мерзімге айырылған.

Кейіннен депутатқа инвестор әйел арыз түсіргені, арызда келіншек депутаттың өзіне қатысты зорлық-зомбылық жасады деп мәлімдегені туралы ақпарат тараған еді.