Бойжеткенді өлтіріп, денесін қоқысқа тастаған жасөспірімнің жазасы ауырлады

Шымкент қаласында 26 жастағы Диана Оңғарбаеваның өліміне қатысты іс бойынша сот үкімі өзгерді, деп хабарлайды Politico.kz.

Үй тазалауға барған жас әйелді азаптап өлтірген 16 жастағы сотталушы бұған дейін 7 жыл 6 айға бас бостандығынан айырылған болатын. Алғашқы үкіммен келіспеген марқұмның туыстары апелляциялық шағым түсіріп, қылмыскерге қатаң жаза тағайындауды талап етті. Алайда апелляциялық сот шешімі жәбірленуші тараптың үмітін толық ақтамады. Қайта қаралған іс нәтижесінде сотталушының жазасы бір жылға ғана ұзартылып, енді ол 8 жыл 6 ай мерзімге сотталды. Бұл шешім қоғамда үлкен резонанс туғызып, Диана Оңғарбаеваның қазасы бойынша әділ жаза мәселесін қайта көтерді.

Шымкент қалалық соты қылмыстық істер жөніндегі сот алқасының төрағасы Бәйдібек Дүйсебектің мәліметінше, апелляциялық сатыда моральдық зиянды өтеу көлемі ұлғайтылды. Атап айтқанда, Қарлығаш Оңғарбаева мен Айдана Оңғарбаеваға өндірілетін өтемақы 2 миллион теңгеден 5 миллион теңгеге дейін көбейтілді, ал Жаппаровтың пайдасына берілетін сома 6 миллион теңгеден 10 миллион теңгеге дейін арттырылды. Осылайша сот моральдық шығынды өтеу бөлігінде талап-арызды ішінара қанағаттандырды.

Айыптау актісінде прокурор сотталушыға қылмыстан кейін мәйітті қорлау дерегі бойынша да айып таққан еді. Алайда сот талқылауы барысында бұл эпизод дәлелдердің жеткіліксіздігіне байланысты алып тасталды. Тергеу материалдарына сәйкес, қайғылы оқиға тамыз айында орын алған: Шымкент қаласында қоқыс жәшігі маңынан пакетке оралған әйелдің мәйіті табылған. Денені тазалық қызметкерлері шамамен 10 күн өткен соң байқаған. Марқұмның артында екі қызы мен жұбайы қалды. Күдікті ретінде 11-сынып оқушысы ұсталып, кейін сот үкімімен кінәлі деп танылған. Диана Оңғарбаеваның өліміне қатысты сот шешімінің өзгеруі қоғам назарын кәмелетке толмағандар жасаған ауыр қылмыстар мен жаза мәселесіне тағы да аударып отыр.