Джеки Чан «Доспехи Бога-4» фильмін Қазақстанда түсіреді

Аты аңызға айналған актер Джеки Чан «Доспехи Бога» франшизасының төртінші бөлімін Қазақстанда түсіреді, деп жазады POLITICO.KZ.

Бұл жаңалықты Digital Bridge 2025 форумы аясында Мемлекет Басшысымен кездесу кезінде қазақстандық Sәlem Entertainment медиакомпаниясының бас директоры Игорь Цай мәлімдеді.

«Қазір біз Джеки Чан басты рөлде ойнайтын фильмді бірлесіп жасап жатырмыз. «Доспехи Бога-4» фильмі Қазақстанда түсіріледі», – деді Игорь Цай.

«Доспехи Бога» франшизасы – бұл Джеки Чанның өзі жасап, сахналаған танымал шытырман оқиғалы боевиктер сериясы болып табылады. Джеки Чан осы сериядағы барлық фильмдердің идея авторы, режиссері және басты рөлді сомдаушысы.

Айта кетейік, Digital Bridge 2025 форумында Sәlem Entertainment компаниясы жасанды интеллект саласындағы жаңа жобаларын таныстырған болатын.