Ғұсман Қырғызбаевқа жерлестері тағы бір автокөлікті тарту етті

Париж Олимпиадасының қола жүлдегері Ғұсман Қырғызбаевқа жерлестері автокөлік пен ат мінгізді. Түркістан облысы дзюдо федерациясының мәліметінше, Темірлан ауданының тұрғындары Ғұсман Қырғызбаевты салтанатты түрде қарсы алған. Жерлестері дзюдошыға автокөлік сыйласа, Түркістан облысы дзюдо федерациясының президенті Хамиддин Жарқынбеков федерация және өз атынан ат мінгізген. Еске сала кетсек, Ғұсман Қырғызбаев Париж Олимпиадасында дзюдодан 66 келі салмақ дәрежесінде бақ сынап, қола жүлде жеңіп алған еді. Ол үшінші орынға таласта сербиялық дзюдошы Страхинья Бунчичтен «вазари» ұпайымен басым түсті. Қырғызбаев елге оралған соң оған әуежайда Қазақстан дзюдо федерациясы атынан Toyota Land Cruiser 250 автокөлігі сыйға тартылды. Сондай-ақ кәсіпкер Кеңес Рақышев дзюдошыға KIA EV 6 автокөлігін мінгізді. Ал Алматы қаласының әкімі Ерболат Досаев 1 бөлмелі пәтер, Hyundai Tucson темір тұлпарын және 4 млн теңгенің сертификатын табыстады. Бұдан бөлек, спортшыға Түркістан облысы Диxанкөл ауылының тұрғындары сәйгүлік мінгізген болатын. Фото: Sputnik/Ертай Сарбасов