Иерусалимде теракт орын алды: белгісіздер жолаушыларға оқ жаудырды

Иерусалимде болған террорлық актіде төрт адам қаза тапты, деп хабарлайды POLITICO.KZ.

Дүйсенбі күні таңертең Израильдің Иерусалим қаласында болған атыс салдарынан төрт адам мерт болып, тағы бес адам ауыр жараланды. Бұл туралы Израильдің жедел жәрдем қызметі хабарлады.

Ресми мәліметке сәйкес, қаза тапқандардың бірі 50 жастағы ер адам, ал қалған үшеуі 30 жас шамасындағы азаматтар. Оқ жарақатын алған бес адам ауыр халде ауруханаға жеткізілген. Сондай-ақ, бірнеше адамға шыны сынықтарынан алған жеңіл жарақаттарына байланысты оқиға орнында көмек көрсетілген.

«Kan» мемлекеттік телерадиокомпаниясының дерегінше, қаруланған екі адам көше қиылысында автобусқа басып кіріп, жолаушыларға оқ атқан.

Израиль полициясының хабарлауынша, шабуыл жасағандар оқиға орнында залалсыздандырылды.